‘#ମିଠୁ’ ମାମଲାରେ ଅନୁଙ୍କୁ ଆଶ୍ବସ୍ତି: ପ୍ରମାଣ ନ ଥିବାରୁ କେସ୍ ବନ୍ଦ କଲା ମହିଳା କମିଶନ

ମୁମ୍ବଇ: ବଲିଉଡ଼ର ଲୋକପ୍ରିୟ ଗାୟକ ତଥା ସଙ୍ଗୀତ ନିର୍ଦ୍ଦେଶକ ଅନୁ ମଲିକଙ୍କୁ ‘#ମିଠୁ’ ଜରିଆରେ ହୋଇଥିବା ଯୌନ ନିର୍ଯାତନା ମାମଲାରେ ଶୁକ୍ରବାର ଆଶ୍ବସ୍ତି ମିଳିଛି। କଣ୍ଠଶିଳ୍ପୀ ସୋନା ମହାପାତ୍ର, ଶ୍ବେତା ପଣ୍ଡିତଙ୍କ ସମେତ ଅନ୍ୟ କେତେକ ମହିଳା କିଛିଦିନ ତଳେ ତାଙ୍କ ନାମରେ ଏହି ଅଭିଯୋଗ ଆଣିଥିଲେ। ମାତ୍ର ଅନୁଙ୍କ ବିରୋଧରେ ଯଥେଷ୍ଟ ପ୍ରମାଣ ନ ମିଳିବାରୁ ଜାତୀୟ ମହିଳା କମିଶନ ଏହି ମାମଲାକୁ ଏବେ ବନ୍ଦ କରିଦେଇଥିବା ଜଣାପଡ଼ିଛି। ଜାତୀୟ ମହିଳା କମିଶନର ଅଧ୍ୟକ୍ଷା ରେଖା ଶର୍ମାଙ୍କ କହିବାନୁସାରେ, ‘‘ଏହି ମାମଲାକୁ ସ୍ଥାୟୀ ଭାବେ ବନ୍ଦ କରାଯାଇନି। ଯଦି ଅଭିଯୋଗକାରୀ ଆଗକୁ ଆସନ୍ତି ଓ ଅନୁଙ୍କ ବିରୋଧରେ ଉପଯୁକ୍ତ ପ୍ରମାଣ ମିଳେ, ତେବେ ଆମେ ଏହି ମାମଲାର ତଦନ୍ତ ପୁଣି ଆରମ୍ଭ କରିପାରୁ’’।

ସୂଚନା ଅନୁସାରେ, ଅନୁ ମଲିକ ଇଣ୍ଡିଆନ ଆଇଡଲ୍-୧୧ର ବିଚାରପତି ରହିଥିଲେ। ହେଲେ ତାଙ୍କ ବିରୋଧରେ ‘#ମିଠୁ’ ଜିରିଆରେ ଯୌନ ନିର୍ଯାତନା ଅଭିଯୋଗ ଆସିବା ପରେ ତାଙ୍କୁ ଶୋ’ରୁ ବାହାର କରିଦିଆଯାଇଥିଲା। ଏହା ସହିତ ତାଙ୍କ ସ୍ଥାନରେ ହିମେଶ ରେଶମିୟାଙ୍କୁ ବିଚାରକ ମଣ୍ଡଳୀରେ ସାମିଲ କରାଯାଇଥିଲା। ମାତ୍ର ନିଜ ଉପରେ ଲାଗିଥିବା ଏହି ଅଭିଯୋଗକୁ ଅନୁ ସମ୍ପୂର୍ଣ୍ଣ ଖଣ୍ଡନ କରିଥିଲେ।