ବନବିଭାଗର ଚଢ଼ାଉ ; ବାଘଛାଲ ଓ ହରିଣ ଶିଙ୍ଗ ଜବତ

ନବରଙ୍ଗପୁର : ଘରେ ଲୁଚାଇ ରଖିଥିଲେ ବାଘଛାଲ ଓ ହରିଣ ଶିଙ୍ଗ। ବନ ବିଭାଗ କୌଣସି ସୂତ୍ରରୁ ଖବର ପାଇ ଚଢ଼ାଉ କରି ବାଘ ଛାଲ, ହରିଣ ଶିଙ୍ଘ ଜବତ କରିଥିବା ଜଣାପଡ଼ିଛି। ସୂଚନା ଅନୁସାରେ, ନବରଙ୍ଗପୁର ଜିଲା ରାଇଘର ବ୍ଲକ୍ ଅନ୍ତର୍ଗତ ଛତିଶଗଡ଼ ସୀମାନ୍ତ କଲମାଡଙ୍ଗରି ଗାଁରେ ଏପରି ଘଟଣା ଘଟିଛି। ଏହି ମାମଲାରେ ୩ ଜଣଙ୍କୁ ଗିରଫ କରାଯାଇଛି। କଲମାଡଙ୍ଗରି ଗାଁର କିଛି ବ୍ୟକ୍ତି ବେଆଇନ ଭାବେ ବାଘଛାଲ, ହରିଣ ଶିଙ୍ଗ ଓ ଅନ୍ୟ ଜୀବଙ୍କ କିଛି ଅବଶେଷ ଘରେ ରଖିଥିବା କୌଣସି ସୂତ୍ରରୁ ଖବର ପାଇଥିଲା ରାଇଘର ବନ ବିଭାଗ। ହେଲେ କଲମାଡଙ୍ଗରି ଗାଁଟି ଛତିଶଗଡ଼ ସୀମାନ୍ତରେ ହୋଇଥିବାରୁ ରାଇଘର ବନ ବିଭାଗ ଛତିଶଗଡ଼ର ଇନ୍ଦଗାଓଁ ବନ ବିଭାଗ ସହ ପ୍ରଥମେ ଯୋଗାଯୋଗ କରିଥିଲା। ଘଟଣାସମ୍ପର୍କରେ ସେମାନଙ୍କୁ ଅବଗତ କରାଇଥିଲା। ବନ ବିଭାଗ ଏଥିପାଇଁ ଏକ ସ୍ୱତନ୍ତ୍ର ଟିମ୍ ଗଠନ କରି ଏହା ଉପରେ ନଜର ରଖିଥିଲା। ଦୁଇ ରାଜ୍ୟର ବନ ବିଭାଗର ସ୍ୱତନ୍ତ୍ର ଟିମ୍‌ର ଚଢ଼ାଉବେଳେ ଗୋଟିଏ କଲରାପତରିଆ ବାଘ ଛାଲ, ହରିଣ ଶିଙ୍ଘ ଏବଂ କିଛି ଅନ୍ୟ ଜୀବଙ୍କ ଅବଶେଷ ଜବତ କରାଯାଇଥିଲା। ଏହି ମାମଲାରେ ବନ ବିଭାଗ ତିନି ଜଣ ଅଭିଯୁକ୍ତଙ୍କୁ ଅଧିକ ପଚରାଉଚରା କରୁଛି।