ଲାହୋର : ପାକିସ୍ତାନ ମୁସ୍ଲିମ୍ ଲିଗ୍-ନୱାଜର ନେତ୍ରୀ ମରିୟମ୍ ନୱାଜ ଏକ ଭିଡିଓ ସାର୍ବଜନୀନ କରିଛନ୍ତି। ଭିଡିଓରେ ଆକାଉଣ୍ଟିବିଲିଟି କୋର୍ଟର ଜଣେ ବିଚାରପତି ସ୍ବୀକାର କରୁଛନ୍ତି ଯେ ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫ୍ଙ୍କୁ ଦୋଷୀ ସାବ୍ୟସ୍ତ କରିବା ଲାଗି ତାଙ୍କୁ ବ୍ଲାକମେଲ ଓ ବାଧ୍ୟ କରାଯାଇଥିଲା। ଏହି ଅବସରରେ ଆୟୋଜିତ ସାମ୍ବାଦିକ ସମ୍ମିଳନୀରେ ନୱାଜ ସରିଫଙ୍କ ଝିଅ ମରିୟମ୍ କହିଛନ୍ତି ଯେ ତାଙ୍କ ପିତାଙ୍କୁ ଦୋଷୀ ସାବ୍ୟସ୍ତ କରିବା ଲାଗି ସମଗ୍ର ଅଦାଲତ ପ୍ରକ୍ରିୟା ସହ ସାଲିସ କରାଯାଇଛି।
୬୯ ବର୍ଷିୟ ସରିଫ୍ ଡିସେମ୍ବର ୨୪, ୨୦୧୮ ଠାରୁ ଲାହୋରସ୍ଥିତ କେଟ୍ ଲାଖପତ ଜେଲ୍ରେ ୭ ବର୍ଷ ଜେଲ୍ ଦଣ୍ଡାଦେଶ ଭୋଗୁଛନ୍ତି। ପାନାମା ପେପର୍ ମାମଲାରେ ତାଙ୍କ ନାମରେ ଜୁଲାଇ ୧୯, ୨୦୧୭ରେ ମାମଲା ରୁଜୁ କରାଯାଇଥିଲା। ଭିଡିଓରେ ଦେଖାଯାଉଛି ଇସ୍ଲାମାବାଦସ୍ଥିତ ଆକାଉଣ୍ଟାବିଲିଟି କୋର୍ଟର ବିଚାରପତି ମହମ୍ମଦ୍ ଅର୍ଶାଦ୍ ମଲିକ ପିଏମ୍ଏଲ୍-ଏନ୍ ସମର୍ଥକ ନାସିର ବଟ୍ଟଙ୍କ ସହ କଥାବାର୍ତ୍ତା ସମୟରେ ଏହା ସ୍ୱୀକାର କରୁଛନ୍ତି। ବିଚାରପତି ଅର୍ଶାଦ କହିଛନ୍ତି, ‘ମୋର ଅବିବେକି ଓ ଏଇ ଭୁଲ୍ କାମ ଯୋଗୁଁ ମୁଁ ଶାନ୍ତିରେ ଶୋଇ ପାରୁ ନାହିଁ।’ ମରିୟମ୍ କହିଛନ୍ତି ଏ ଭିଡିଓରେ ପ୍ରକୃତ କଥା ଜଣାପଡିବା ପରେ ତାଙ୍କ ବାପାଙ୍କୁ ଆଉ ଜେଲ୍ରେ ରଖାଯିବା ଉଚିତ ନୁହେଁ। ସରିଫଙ୍କ ଜାମିନ ପାଇଁ ଇସ୍ଲାମାବାଦ ହାଇକୋର୍ଟରେ ସେ ଏହି ଭିଡିଓକୁ ଦାଖଲ କରିବେ ବୋଲି ମରିୟମ କହିଛନ୍ତି।
