ପ୍ରୋଭିଡେଣ୍ଟ ଫଣ୍ଡ ଉଠାଣ ସୀମା ୫ ଲକ୍ଷକୁ ବୃଦ୍ଧି

ଡେସ୍କ: କର୍ମଚାରୀ ଭବିଷ୍ୟନିଧି ପାଣ୍ଠି ସଂଗଠନ ଏହାର ସାଢ଼େ ୭ କୋଟି ସଦସ୍ୟଙ୍କ ଲାଗି ଅଗ୍ରିମ ଅର୍ଥ ଉଠାଣ ବର୍ତ୍ତମାନର ୧ ଲକ୍ଷ ଟଙ୍କାରୁ ୫ ଗୁଣ ବୃଦ୍ଧି କରିବାକୁ କେନ୍ଦ୍ର ସରକାର ନିଷ୍ପତ୍ତି ନେଇଛି। ଶ୍ରମ ଓ ନିଯୁକ୍ତି ମନ୍ତ୍ରଣାଳୟର ସଚିବ ସୁମିତା ଦାୱରା ଗତ ସପ୍ତାହରେ ଅନୁଷ୍ଠିତ କେନ୍ଦ୍ରୀୟ ଟ୍ରଷ୍ଟି ବୋର୍ଡର କାର୍ଯ୍ୟନିର୍ବାହୀ କମିଟିର ୧୧୩ତମ ବୈଠକରେ ଏହି ସୀମାକୁ ୧ ଲକ୍ଷ ଟଙ୍କାରୁ ୫ ଲକ୍ଷ ଟଙ୍କାକୁ ବୃଦ୍ଧି ପ୍ରସ୍ତାବକୁ ଅନୁମୋଦନ କରିଥିଲେ।

ମାର୍ଚ୍ଚ ୨୮ରେ ଜମ୍ମୁ-କଶ୍ମୀରର ଶ୍ରୀନଗରରେ ଅନୁଷ୍ଠିତ ଏହି ବୈଠକରେ ଇପିଏଫ୍ଓର କେନ୍ଦ୍ରୀୟ ଭବିଷ୍ୟନିଧି ପାଣ୍ଠି କମିଶନର ରମେଶ କୃଷ୍ଣମୂର୍ତ୍ତି ଯୋଗ ଦେଇଥିଲେ। ଏଥିରେ ମେ’ ଶେଷ ସୁଦ୍ଧା ୟୁପିଆଇ ଆଧାରିତ ପିଏଫ ଉଠାଣ ଆରମ୍ଭ କରିବା ନେଇ ଇପିଏଫଓ ନିଷ୍ପତ୍ତି ନେଇଛି। ଏବେ ଏହି ସୁପାରିସ ସିବିଟିର ଅନୁମୋଦନ ପାଇଁ ପଠାଯିବ।

ସିବିଟିର ଅନୁମୋଦନ ପରେ ଇପିଏଫଓ ସଦସ୍ୟମାନେ ଏଏସଏସି ଜରିଆରେ ୫ ଲକ୍ଷ ଟଙ୍କା ପର୍ଯ୍ୟନ୍ତ ପିଏଫ ଉଠାଇ ପାରିବେ। ଅସୁସ୍ଥତା ପାଇଁ ଆଗୁଆ ପାଇଁ ୨୦୨୦ ଏପ୍ରିଲରେ ଅଟୋ ମୋଡ୍ ଅଫ୍ କ୍ଲେମ୍ ସେଟଲମେଣ୍ଟ ଆରମ୍ଭ କରାଯାଇଥିଲା।

୨୦୨୪ ମେ’ରେ ଇପିଏଫଓ ଆଡଭାନ୍ସଡ୍ କ୍ଲେମ୍ ସୀମାର ଅଟୋ ସେଟଲମେଣ୍ଟକୁ ୫୦ ହଜାର ଟଙ୍କାରୁ ୧ ଲକ୍ଷ ଟଙ୍କାକୁ ବୃଦ୍ଧି କରିଥିଲା। ଇପିଏଫଓ ଶିକ୍ଷା, ବିବାହ ଏବଂ ଆବାସ ଭଳି ଆଉ ୩ଟି ବର୍ଗ ପାଇଁ ଆଗୁଆ ଦାବିର ଅଟୋ ମୋଡ୍ ସେଟଲମେଣ୍ଟ ଆରମ୍ଭ କରିଛି। ପୂର୍ବରୁ ସଦସ୍ୟମାନେ କେବଳ ଅସୁସ୍ଥତା/ଡାକ୍ତରଖାନାରେ ଭର୍ତ୍ତି ହେବା ଉଦ୍ଦେଶ୍ୟରେ ନିଜର ପିଏଫ ଉଠାଇ ପାରୁଥିଲେ। ଅଟୋ-ମୋଡ୍ ଦାବିକୁ ତିନି ଦିନ ମଧ୍ୟରେ ପ୍ରକ୍ରିୟାକରଣ କରାଯାଏ ଏବଂ ୯୫ ପ୍ରତିଶତ ଦାବି ଏବେ ସ୍ୱୟଂଚାଳିତ ହୋଇଛି।