ତ୍ରିସ୍ତରୀୟ ପଞ୍ଚାୟତ ନିର୍ବାଚନ: ଲଗାତର ପଞ୍ଚମ ଥର ବିଜୟୀ ଲକ୍ଷ୍ୟରେ ନିରୂପମା

ଲକ୍ଷ୍ମୀପୁର: କୋରାପୁଟ ଜିଲା ଲକ୍ଷ୍ମୀପୁର ବ୍ଲକରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ଓଡିଆପେଣ୍ଠ ପଞ୍ଚାୟତରେ ସର୍ବାଧିକ ୯ ଜଣ ପ୍ରାର୍ଥୀ ରହିଥିବା ବେଳେ କୁଟିଙ୍ଗା ପଞ୍ଚାୟତରେ ସର୍ବନିମ୍ନ ଦୁଇ ଜଣ ପ୍ରାର୍ଥୀ ରହିଛନ୍ତି। ଓଡିଆପେଣ୍ଠ ପଞ୍ଚାୟତଟି ବର୍ତ୍ତମାନ ଖଣି ଅଞ୍ଚଳର କେନ୍ଦ୍ର ସ୍ଥଳ କହିଲେ ଅତ୍ୟୁକ୍ତି ହେବନାହିଁ। ଏବେ ଓଡିଆପେଣ୍ଠ ପଞ୍ଚାୟତରେ ଚଳିତ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ରାଜନୈତିକ ବାତାବରଣ ସରଗରମ ହୋଇ ଉଠିଛି। ଏଠାରେ ବର୍ତ୍ତମାନ ୯ ଜଣ ପ୍ରାର୍ଥୀ ନିର୍ବାଚନ ରଣାଙ୍ଗନରେ ଅବତୀର୍ଣ୍ଣ ହୋଇଛନ୍ତି। ସେହିପରି କୁଟିଙ୍ଗା ପଞ୍ଚାୟତରେ ମାତ୍ର ଦୁଇ ଜଣ ପ୍ରାର୍ଥୀ ମଇଦାନରେ ଥିବା ଜଣାପଡ଼ିଛି। ଏହି ପଞ୍ଚାୟତରୁ ଲଗାତର ୪ ଥର ବିଜୟୀ ହୋଇଥିବା ନିରୂପମା ୱାଡେକା ପ୍ରାର୍ଥୀ ହୋଇଥିବା ବେଳେ ତାଙ୍କ ସହିତ ରହିଛନ୍ତି ସୁଲୋଚନା ମାଝୀ। ତେବେ ନିରୂପମା ୱାଡେକା ଲଗାତାର ଭାବେ ପଞ୍ଚମଥର ପାଇଁ ସରପଞ୍ଚ ଭାବେ ବିଜୟୀ ହୋଇ ରେକର୍ଡ ସୃଷ୍ଟି କରିବାକୁ ଲକ୍ଷ୍ୟ ରଖିଛନ୍ତି।