ଲାଞ୍ଜିଗଡ଼: କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ଥାନା ଅନ୍ତର୍ଗତ ଲାଞ୍ଜିଗଡ଼ଠାରୁ ମୁନିଗୁଡ଼ା ଯିବା ରାସ୍ତାର ରାଜା ଫିଲିଂ ଷ୍ଟେସନ ପେଟ୍ରୋଲ ପମ୍ପ ନିକଟରେ ଏକ ଅଜଣା ଗାଡ଼ି ଧକ୍କାରେ ଜଣେ ଯୁବକଙ୍କ ମୃତ୍ୟୁ ଘଟିଛି।
ଖବର ଅନୁଯାୟୀ, ଶୁକ୍ରବାର ସକାଳ ୭ଟା ସମୟରେ ମୁକେଶ ସିକନ୍ଦର(୧୯) ନାମକ ଜଣେ ଯୁବକ ଲାଞ୍ଜିଗଡ଼ଠାରୁ ମୁନିଗୁଡା ଯିବା ରାସ୍ତାରେ ନିଜ ବାଇକ ନେଇ ଯାଉଥିବା ସମୟରେ ରାଜା ଫିଲିଂ ଷ୍ଟେସନ ପେଟ୍ରୋଲ ପମ୍ପ ନିକଟରେ ଏକ ଅଜଣା ଗାଡି ଧକ୍କା ଦେଇଥିଲା। ଫଳରେ ମୁକେଶ ରାସ୍ତା ଉପରେ ନିଜ ବାଇକ ସହ ପଡି ଯାଇଥିବା ବେଳେ ତାଙ୍କ ମୁଣ୍ଡ ପଛପଟେ ଗଭୀର ଆଘାତ ଲାଗିଥିଲା। ସେହି ରାସ୍ତା ଦେଇ ଶହ ଶହ ଲୋକ ଯାତାୟତ କରୁଥିଲେ ମଧ୍ୟ ଗୁରୁତର ମୁକେଶଙ୍କ ନିକଟକୁ କେହି ଯାଇନଥିଲେ। ପରେ ନିଜ ସମ୍ପର୍କୀୟ ଆସି ମୁକେଶଙ୍କୁ ଗାଡି ଉପରୁ ଉଠାଇ ଆଣି ରାସ୍ତା କଡରେ ରଖିଥିଲେ। ଏ ସଂପର୍କରେ ଖବର ପାଇ ଲାଞ୍ଜିଗଡ଼ ଥାନା ଅଧିକାରୀ ସତ୍ୟାନନ୍ଦ ପାତ୍ର ଘଟଣା ସ୍ଥଳରେ ପହଞ୍ଚି ଗୁରୁତର ମୁକେଶଙ୍କୁ ନିଜ ପୁଲିସ ଗାଡ଼ିରେ ଲାଞ୍ଜିଗଡ଼ ଡାକ୍ତରଖାନାକୁ ଆଣିଥିଲେ। କିନ୍ତୁ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ଏନେଇ ଲାଞ୍ଜିଗଡ଼ ଥାନା ଏସଆଇ ବିଳାସିନୀ ଭୋଇ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିବା ବେଳେ ବ୍ୟବଚ୍ଛେଦ ପରେ ମୁକେଶଙ୍କ ସମ୍ପର୍କୀୟମାନଙ୍କୁ ମୃତଦେହ ହସ୍ତାନ୍ତର କରିଛନ୍ତି। ମୁକେଶ ରାଜସ୍ଥାନ ରାଜ୍ୟ ଯୋଧପୁର ଅଞ୍ଚଳର ଦୁଡ଼ଲି ଗାଁର ବୋଲି ଆଧାର କାର୍ଡରୁ ଜଣାପଡ଼ିଛି। ସେ କିଛି ମାସ ହେଲା ଲାଞ୍ଜିଗଡ଼କୁ ତାଙ୍କ ସମ୍ପର୍କୀୟ ଭାଇଙ୍କ ସହ ଆସି ଗାଁକୁ ଗାଁ ବୁଲି ବରା ପକୁଡ଼ି ବିକ୍ରି କରୁଥିଲେ।
Comments are closed.