ନୂଆଦିଲ୍ଲୀ: ଦୀର୍ଘ ୧୨୫୮ ଦିନ ପରେ ଆଇସିସି ଦିନିକିଆ ରାଙ୍କିଙ୍ଗର ଶୀର୍ଷ ସ୍ଥାନରୁ ହଟିଛନ୍ତି ଭାରତୀୟ ଅଧିନାୟକ ବିରାଟ କୋହଲି। କୋହଲିଙ୍କୁ ପଛରେ ପକାଇ ପାକିସ୍ତାନ କ୍ରିକେଟ ଦଳର ଅଧିନାୟକ ବାବର ଆଜମ ବିଶ୍ଵର ୧ ନମ୍ବର ଦିନିକିଆ କ୍ରିକେଟର ଭାବେ ଶୀର୍ଷ ସ୍ଥାନ ହାସଲ କରିଛନ୍ତି। ଦକ୍ଷିଣ ଆଫ୍ରିକା ବିପକ୍ଷ ସିରିଜରେ ଆଜମଙ୍କ ଜବରଦସ୍ତ ପ୍ରଦର୍ଶନ ତାଙ୍କୁ ଏହି ସଫଳତା ଦେଇଛି। ଆଇସିସି ବୁଧବାର ଜାରି କରିଥିବା ରାଙ୍କିଙ୍ଗରେ ଆଜମ ୮୬୫ ପଏଣ୍ଟ ସହିତ ଶୀର୍ଷରେ ରହିଛନ୍ତି।
ଆଜମଙ୍କ ପଛକୁ ଅଛନ୍ତି ଭାରତୀୟ ଅଧିନାୟକ ବିରାଟ କୋହଲି। କୋହଲି ଆଜମଙ୍କଠାରୁ ୮ ପଏଣ୍ଟ କମ୍ ସହିତ ୨ୟ ସ୍ଥାନରେ ରହିଛନ୍ତି। ସେହିପରି ୩ୟ ସ୍ଥାନରେ ଭାରତୀୟ ଦଳର ଉପଅଧିନାୟକ ରୋହିତ ଶର୍ମା ୩ୟ ସ୍ଥାନରେ ଅଛନ୍ତି।
ବାବର ଆଜମ ବିଶ୍ଵର ୧ ନମ୍ବର ଖେଳାଳି ହେବାରେ ୪ର୍ଥ ପାକିସ୍ତାନୀ। ତାଙ୍କ ପୂର୍ବରୁ ଜହୀର ଆବ୍ବାସ (୧୯୮୩-୮୪), ଜାଭେଦ ମିଆଁଦାଦ (୧୯୮୮-୮୯) ଏବଂ ମହମ୍ମଦ ୟୁସୁଫ ୧ ନମ୍ବର ରାଙ୍କିଙ୍ଗ୍ ହାସଲ କରିଛନ୍ତି। ୨୦୧୦ ଏବଂ ୨୦୧୨ରେ ୧୯ ବର୍ଷରୁ କମ୍ ବିଶ୍ଵକପ୍ରେ ଚମତ୍କାର ପ୍ରଦର୍ଶନ କରିବା ପରେ ୨୦୧୫ରେ ଆଜମଙ୍କୁ ପାକିସ୍ତାନ ଦିନିକିଆ ଦଳରେ ସ୍ଥାନ ମିଳିଥିଲା।
ସୂଚନାଯୋଗ୍ୟ, ଦକ୍ଷିଣ ଆଫ୍ରିକା ବିପକ୍ଷ ସିରିଜ ପୂର୍ବରୁ ବାବର ଆଜମଙ୍କର ୮୩୭ ରେଟିଂ ପଏଣ୍ଟ ରହିଥିଲା। କିନ୍ତୁ ପ୍ରଥମ ମ୍ୟାଚରେ ୧୦୩ ରନର ଶତକୀୟ ପାଳି ସହିତ ଅନ୍ତିମ ମ୍ୟାଚରେ ୯୪ ରନ୍ର ଇନିଂସ ଫଳରେ ତାଙ୍କ ପଏଣ୍ଟ ଦ୍ରୁତଗତିରେ ବୃଦ୍ଧି ପାଇଥିଲା। ଏହି ସିରିଜକୁ ପାକିସ୍ତାନ ୨-୧ରେ ଜିତିନେଇଥିଲା।
