ମୁମ୍ବଇ: ଅଭିନେତ୍ରୀ କିଆରା ଆଡଭାନୀ ଓ ଶାହିଦ କପୁରଙ୍କ ଯୋଡ଼ି ଖୁବଶୀଘ୍ର ପରଦାରେ ଦେଖିବାକୁ ମିଳିବ। ତାଙ୍କ ଅଭିନୀତ ଆଗାମୀ ଚଳଚ୍ଚିତ୍ର ‘କବୀର ସିଂ’ର ଶୁଟିଂ ପ୍ରାୟ ଅନ୍ତିମ ପର୍ଯ୍ୟାୟରେ ପହଞ୍ଚିଛି। ଏହା ଏକ ରୋମାଣ୍ଟିକ୍-ଡ୍ରାମା ଭିତ୍ତିକ ଚଳଚ୍ଚିତ୍ର। ଜୁନ୍ ୨୧ରେ ଏହା ମୁକ୍ତିଲାଭ କରିବ ବୋଲି ସୂଚନା ମିଳିଛି। ଏହି ଚଳଚ୍ଚିତ୍ରରେ ଅଭିନୟ ଏକ ମଜାଦାର ଅନୁଭୂତି ଏବଂ ଏହାର ମୁକ୍ତିଲାଭକୁ ଉତ୍କଣ୍ଠାର ସହ ଅପେକ୍ଷା କରିଥିବା କିଆରା ପ୍ରକାଶ କରିଛନ୍ତି।
ଉଲ୍ଲେଖଯୋଗ୍ୟ, ଏକାଧିକ ପ୍ରସିଦ୍ଧ କଳାକାରଙ୍କ ଅଭିନୀତ ଚଳଚ୍ଚିତ୍ର ‘କଳଙ୍କ୍’ର ଏକ ଗୀତରେ ମଧ୍ୟ କିଆରାଙ୍କ ନୃତ୍ୟ ଦେଖିବାକୁ ମିଳିବ। ଏହି ଗୀତରେ ଅଭିନେତା ବରୁଣ ଧାଓ୍ବନଙ୍କ ସହ ତାଙ୍କ ଯୋଡ଼ି ବେଶ୍ ଜମିଥିବା ଦେଖିବାକୁ ମିଳିଛି। ଏକ କାର୍ଯ୍ୟକ୍ରମରେ କିଆରା କହିଥିଲେ, ଭବିଷ୍ୟତରେ ମୁଁ ଓ ବରୁଣ ଏକତ୍ର ଚଳଚ୍ଚିତ୍ର କରିବୁ। ଲୋକମାନେ ଏହି ଗୀତରେ ଆମ ଯୋଡ଼ିକୁ ପସନ୍ଦ କରିଛନ୍ତି ଏବଂ ତାହା ହିଁ ଆମ ପାଇଁ ଯୋଗ୍ୟତାର ମାପଦଣ୍ଡ ହେବ ବୋଲି ସେ କହିଛନ୍ତି।
ସୂଚନାଯୋଗ୍ୟ, ସନ୍ଦୀପ ଭାଙ୍ଗା ‘କବୀର ସିଂ’ର କାହାଣୀ ରଚନା କରିବା ସହିତ ଏହାର ନିର୍ଦ୍ଦେଶନା ମଧ୍ୟ ଦେଇଛନ୍ତି। ତାଙ୍କ ନିର୍ଦ୍ଦେଶିତ ତେଲୁଗୁ ଚଳଚ୍ଚିତ୍ର ‘ଅର୍ଜୁନ ରେଡି’ର ଏହା ହେଉଛି ରିମେକ୍।
Comments are closed.