ଖୁଣ୍ଟା : ଖୁଣ୍ଟା ମିନି ଷ୍ଟାଡିୟମରେ ସାନଖୁଣ୍ଟା ଗ୍ରାମ ପଞ୍ଚାୟତ ପକ୍ଷରୁ ସରକାରଙ୍କ ପିଠା କାର୍ଯ୍ୟକ୍ରମ ସହିତ ଟିଟିଆ ଗ୍ରାମ ପଞ୍ଚାୟତ ଓ ଶିଳଘାଟି ଗ୍ରାମ ପଞ୍ଚାୟତକୁ ମିଶାଇ ଗୋପବନ୍ଧୁ ନଗର ବ୍ଲକର ତିନି ଗୋଟି ସ୍ଥାନରେ ଏକକାଳୀନ ପିଠା କାର୍ଯ୍ୟକ୍ରମ ଉଦଘାଟିତ ହୋଇଯାଇଛି। ଗ୍ରାମ ପଞ୍ଚାୟତ ସ୍ତରରେ ପିଠା କ୍ୟାମ୍ପର ଆୟୋଜନ କରାଯାଇ ସରକାରଙ୍କ ବିଭିନ୍ନ ଯୋଜନା ବାବଦରେ ହିତାଧିକାରୀଙ୍କୁ ସଚେତନ କରାଇବା ସହିତ ସେମାନଙ୍କର ହକ୍ ସେମାନଙ୍କ ନିକଟରେ ସିଧାସଳଖ ପହଞ୍ଚାଇବା କାର୍ଯ୍ୟକ୍ରମର ଉଦେଶ୍ୟ ବୋଲି ଗୋପବନ୍ଧୁ ନଗର ବିଡିଓ ମନୋଜ କୁମାର ବେହେରା ଉପସ୍ଥିତ ଜନସାଧାରଣଙ୍କୁ କହିଥିଲେ। ତିନୋଟି ପଞ୍ଚାୟତରେ ୩୩ ଜଣ ହିତାଧିକାରୀଙ୍କୁ ଗ୍ରାମୀଣ ବିଦ୍ୟୁତିକରଣ ଯୋଜନାରେ ସାମିଲ କରାଯାଇଛି, ନୂତନ ଭାବେ ୨୯ ଜଣ ହିତାଧିକାରୀଙ୍କୁ ମଧୁବାବୁ ପେନସନ, ପଞ୍ଚାୟତ ପ୍ରତି୨ଜଣ କରି ମୋଟ ୬ ଜଣଙ୍କୁ ବିଜୁ ପକ୍କା ଘର ପୂର୍ଣ୍ଣାଙ୍ଗ କରଣ ସହାୟତା, ଟିଟିଆ ଗ୍ରାମପଞ୍ଚାୟତର ୨ଜଣଙ୍କୁ ହରିଶ୍ଚନ୍ଦ୍ର ସହାୟତା, ସାନଖୁଣ୍ଟା ପଞ୍ଚାୟତର ଜଣଙ୍କୁ କଳାକାର ଭତ୍ତା ପ୍ରଦାନ କରାଯାଇଛି। ମିନି ଷ୍ଠାଡିୟମରେ ଅୟୋଜିତ କାଯ୍ୟକ୍ରମରେ ସାନଖୁଣ୍ଟା ସରପଞ୍ଚ ସୁମିତ୍ରା ନାଏକ କାର୍ଯ୍ୟକ୍ରମକୁ ଉଦଘାଟନ କରିଥିବା ବେଳେ ବିଡିଓ ଶ୍ରୀ ବେହେରା ମୁଖ୍ୟ ଅତିଥି, ସମିତି ସଭ୍ୟା ସାବିତ୍ରୀ ମୁର୍ମୁ ସମ୍ମାନୀତ ଅତିଥି ଭାବେ ଯୋଗ ଦେଇଥିଲେ। ସେହିପରି ଟିଟିଆ ଗ୍ରାମ ପଞ୍ଚାୟତରେ ସରପଞ୍ଚ ସରସ୍ୱତୀ ମାଝୀ କାର୍ଯ୍ୟକ୍ରମକୁ ଉଦଘାଟନ କରିଥିବା ବେଳେ ବ୍ଲକର ସହକାରୀ ଯନ୍ତ୍ରୀ ଶରତ କୁମାର ବେହେରା ମୁଖ୍ୟ ଅତିଥିଭାବେ ଯୋଗ ଦେଇଥିଲେ। ଅନୁରୂପ ଭାବେ ଶିଳଘାଟି ଗ୍ରାମ ପଞ୍ଚୟତରେ ଆୟୋଜିତ କାର୍ଯ୍ୟକ୍ରମରେ ସରପଞ୍ଚ କାର୍ଯ୍ୟକ୍ରମ ଉଦଘାଟନ କରିଥିଲେ।
Popular Categories
Previous article
Next article