ମୁମ୍ବଇ : ୨୧ ମାର୍ଚ୍ଚ ହୋଲି ଅବସରରେ ମୁକ୍ତିଲାଭ କରିଥିବା ଅକ୍ଷୟ କୁମାରଙ୍କ ଅଭିନୀତ ଚଳଚ୍ଚିତ୍ର ‘କେଶରୀ’ ବକ୍ସ ଅଫିସରେ ଉଲ୍ଲେଖନୀୟ ପ୍ରଦର୍ଶନ ଜାରି ରଖିଛି। ମାତ୍ର ଅନେକ ରେକର୍ଡ଼ ହାସଲ କରିଥିବା ଏହି ଚଳଚ୍ଚିତ୍ର ରବିବାର ଆଶାଠାରୁ କମ୍ ବ୍ୟବସାୟ କରିଛି। ଚଳଚ୍ଚିତ୍ରର ବ୍ୟବସାୟ ଉପରେ ଆଇପିଏଲର ପ୍ରଭାବ ପଡ଼ିଥିବା କୁହାଯାଉଛି। ରବିବାର ଚଳଚ୍ଚିତ୍ର ୨୪ କୋଟରୁ ଅଧିକ ଆୟ କରିବ ବୋଲି ଆଶା କରାଯାଉଥିଲେ ହେଁ ଏହା ୨୧.୫୧ କୋଟି ଆୟ କରିଛି। ଏହାସତ୍ତ୍ବେ ସପ୍ତାହେ ମଧ୍ୟରେ ଚଳଚ୍ଚିତ୍ର ୧୦୦ କୋଟି ପାର କରିବ ବୋଲି ଟ୍ରେଡ଼ ଆନାଲିଷ୍ଟ ତରଣ ଆଦର୍ଶ କହିଛନ୍ତି।
ତରଣଙ୍କ କହିବା ଅନୁସାରେ, ରବିବାର ସୁଦ୍ଧା ଚଳଚ୍ଚିତ୍ର ଭାରତୀୟ ବଜାରରେ ୭୮.୦୭ କୋଟି ଟଙ୍କାର ବ୍ୟବସାୟ କରିଛି। ମୁକ୍ତିଲାଭର ପ୍ରଥମ ଦିନ ଅର୍ଥାତ୍ ଗୁରୁବାର ଚଳଚ୍ଚିତ୍ର ୨୧.୦୬ କୋଟି ଟଙ୍କା ଆୟ କରିଛି। ଯଦ୍ୱାରା ଏହା ଚଳିତ ବର୍ଷ ମୁକ୍ତିଲାଭର ପ୍ରଥମ ଦିନରେ ସବୁଠାରୁ ଅଧିକ ଆୟ କରିଥିବା ଚଳଚ୍ଚିତ୍ର ପାଲଟଛି। ସେହିପରି ଶୁକ୍ରବାର ୧୬.୭୫ କୋଟି, ଶନିବାର ୧୮.୭୫ କୋଟି ଓ ରବିବାର ୨୧.୫୧ କୋଟି ଟଙ୍କା ଆୟ କରିଛି। ଚଳଚ୍ଚିତ୍ରରେ ପରିଣୀତିଙ୍କୁ ଅକ୍ଷୟଙ୍କ ବିପକ୍ଷ ନାୟିକା ଭାବେ ଦେଖିବାକୁ ମିଳିଛି।
