କଳାପଥର(ବାଙ୍କୀ): ବୈଦ୍ୟେଶ୍ୱର ଥାନା ଅନ୍ତର୍ଗତ ଗୋଳାଗଣ୍ଡ ପଞ୍ଚାୟତର ସାତଖଣ୍ଡ ଗ୍ରାମରେ ଥିବା ସ୍ୱୟଂଭୁ ଫାର୍ମହାଉସରେ ସୌରଚାଳିତ ଶୀତଳ ଭଣ୍ଡାର ଉଦଘାଟିତ ହୋଇଯାଇଛି। ଏହି ଅବସରରେ ସନ ମାଇଷ୍ଟରର(ଚେନ୍ନାଇ) ଡାଇରେକ୍ଟର ଶାଶ୍ୱତ ଦାଶ ନିଜସ୍ୱ ପ୍ରୟାସରେ ଏକ ସୌର ଚାଳିତ ଶୀତଳ ଭଣ୍ଡାର ୫ ମେଟ୍ରିକ ଟନ୍ କ୍ଷମତା ମେସିନକୁ ଉଦଘାଟନ କରିଥିଲେ। ଏହି କାର୍ଯ୍ୟକ୍ରମରେ ନିର୍ଦେଶକ ଅଶୋକ ମହାନ୍ତି, ମନୋସ୍ୱିନୀ ମହାନ୍ତି, ଶୈଳେଶ ପଟ୍ଟନାୟକ, କମଳାକାନ୍ତ ପ୍ରହରାଜ, ଚାଷୀ ସିଧେଶ୍ୱର ପାଇକେରାୟ, ସମାଜସେବୀ ପ୍ରଫୁଲ୍ଲ ସେନାପତି, ଭବାନୀ ଶଙ୍କର ମିଶ୍ର ଏବଂ ବିଭୁଦତ୍ତ ରଞ୍ଜନ ପଟ୍ଟନାୟକ ପ୍ରମୁଖ ଉପସ୍ଥିତ ରହି ଆନୁଷ୍ଠାନିକ ସହଯୋଗ କରି ଥିଲେ। ବାଙ୍କୀର ଦୀର୍ଘ ଦିନର ଚାଷୀ ସମସ୍ୟାକୁ ଦୂରକରି ପନିପରିବାର ଅଭାବୀ ବିକ୍ରି ରୋକିବାକୁ ଦୃଷ୍ଟିରେ ରଖି ଏକ ଅତ୍ୟାଧୁନିକ ଟେକ୍ନୋଲୋଜିର ଉପଯୋଗ କରି ଉକ୍ତ ଶୀତଳଭଣ୍ଡାରଟି ଚାଷୀମାନଙ୍କ ପାଇଁ ଲୋକାର୍ପିତ କରାଗଲା। ବୈଦେଶ୍ବର ଏବଂ ଗୋଳାଗଣ୍ଡ ଅଞ୍ଚଳର ଚାଷୀମାନଙ୍କର ଆର୍ଥିକ ଅଭିବୃଦ୍ଧି ନିମନ୍ତେ ଏହି ଶୀତଳ ଭଣ୍ଡାରଟି ଉଦିଷ୍ଟ ହୋଇପାରିବ ବୋଲି ସ୍ଥାନୀୟ ଅଞ୍ଚଳର ବହୁ ବୁଦ୍ଧିଜୀବୀ ମତବ୍ୟକ୍ତ କରିଛନ୍ତି। ଚାଷୀ ଉତ୍ପାଦିତ ଟମାଟୋ, କଖାରୁ, ଗ୍ରୀନ ମଟର, ଆମ୍ବ, ପୋଟଳ, ବାଇଗଣ କଞ୍ଚାଲଙ୍କା ଏପରିକି ବିଭିନ୍ନ ପ୍ରକାରର ଫୁଲ ଆଦି ବିଭିନ୍ନ ଫଳ ସରଂକ୍ଷଣ କରି ଅଭାବୀ ବିକ୍ରିରୁ ରକ୍ଷା ପାଇପାରିବ। ଫଳରେ ଚାଷୀ ଆତ୍ମନିର୍ଭର ହେବା ସହ ଦକ୍ଷତା ବୃଦ୍ଧି ହୋଇପାରିବ। ସ୍ୱୟଂଭୁର ଏହି ଅଭିନବ ପ୍ରୟାସ ଯୁଗପଯୋଗୀ ଓ ସ୍ୱାବଲମ୍ବୀ ସମାଜ ଗଠନରେ ପ୍ରମୁଖ ଭୂମିକା ଗ୍ରହଣ କରିଛି।
Popular Categories
Previous article
Next article