ଢେଙ୍କାନାଳ : ଆଜିଠାରୁ ଢେଙ୍କାନାଳ ଜିଲ୍ଲା ଯୋରନ୍ଦା ମହିମାଗାଦିରେ ବିଶ୍ଵ ପ୍ରସିଦ୍ଧ ମାଘମେଳା ଆରମ୍ଭ ହୋଇଛି। ଜଗତର ମଙ୍ଗଳ ପାଇଁ ମହିମା ସନ୍ନ୍ୟାସୀମାନେ ଝାଡଦ୍ଵୀପ ପ୍ରଜ୍ବଳନ କରିବେ। ଏଥିଲାଗି ବ୍ୟାପକ ପ୍ରସ୍ତୁତି କରାଯାଇଛି। ମଙ୍ଗଳବର ମାଘ ଶୁକ୍ଳ ଚତୁର୍ଦଶୀ, ବୁଧବାର ପୂର୍ଣ୍ଣମୀ ଏବଂ ୧୩ ତାରିଖ ଗୁରୁବାର ପ୍ରତିପଦା ୩ ଦିନ ଧରି ଝାଡଦୀପ ପ୍ରଜ୍ବଳନ ହେବ। ରାଜ୍ୟର ବିଭିନ୍ନ ସ୍ଥାନରୁ ମହିମା ସାଧୁମାନେ ଗାଦିରେ ବସିବା ନେଇ ବିଭିନ୍ନ ମଠ ପକ୍ଷରୁ ସୂଚନା ମିଳିଛି। ମାଘ ଶୁକ୍ଳ ଚତୁର୍ଦଶୀ ଏବଂ ପୂର୍ଣ୍ଣମୀ ଦୁଇ ଦିନ ଧରି ଗାଦି ମନ୍ଦିରର ଚାରି ମୁଖଶାଳାରେ ବୃହତ୍ ଝାଡଦୀପ ପ୍ରଜ୍ବଳନ କରାଯିବ। ଝାଡଦୀପରେ ଘୃତାହୁତି କରି ଜଗତ ର ମଙ୍ଗଳ କାମନା କରାଯାଇଥାଏ। ମହିମା ଧର୍ମର ପବିତ୍ର ପୀଠ ଯୋରନ୍ଦା ମହିମା ଗାଦିରେ ୧୮୭୪ ମସିହାରେ ମହିମା ଗୋସାଇଁ ଯୋରନ୍ଦା ମାଘ ମେଳା ଆରମ୍ଭ କରିଥିଲେ। ସେବେଠାରୁ ଯୋରନ୍ଦାରେ ବାର୍ଷିକ ମାଘମେଳାରେ ସାଧୁ, ସନ୍ନାସୀ ଓ ଭକ୍ତ ସମବେତ ହୋଇ ଝାଡଦ୍ଵୀପରେ ଘୃତାହୁତି ପ୍ରଦାନ କରି ଆସୁଛନ୍ତି। ସେପଟେ ମେଳା ସୁପରିଚାଳନା ପାଇଁ ପ୍ରଶାସନ ପକ୍ଷରୁ ଦୁଇ ଥର ପ୍ରସ୍ତୁତି ବୈଠକ କରାଯାଇ ଶୃଙ୍ଖଳା ରକ୍ଷା , ରାସ୍ତାଘାଟର ଉନ୍ନତିକରଣ , ଆଲୋକୀକରଣ , ଗାଡି ପାର୍କିଂ , ପାନୀୟ ଜଳ, ସ୍ଵାସ୍ଥ୍ୟ ପରିମଳ ଆଦି କୁ ବିଶେଷ ଗୁରୁତ୍ଵ ଦିଆଯାଇଛି।
Comments are closed.