ପାଟଣା: ରାଷ୍ଟ୍ରୀୟ ଜନତା ଦଳ ଅଧ୍ୟକ୍ଷ ଲାଲୁ ଯାଦବ ଜେଲରୁ ଦଳୀୟ ପ୍ରାର୍ଥୀଙ୍କୁ ଟିକେଟ ବାଣ୍ଟୁଥିବା ଜନତା ଦଳ ୟୁନାଇଟେଡ଼ ଅଭିଯୋଗ କରିଛି। ଆରଜେଡିର ସମସ୍ତ ପ୍ରାର୍ଥୀଙ୍କ ମନୋନୟନ ପତ୍ର ଖାରଜ ପାଇଁ ଜେଡିୟୁ ନିର୍ବାଚନ କମିଶନଙ୍କ ପାଖରେ ଦାବି କରିଛି। ଜେଡିୟୁ ମୁଖପାତ୍ର ନୀରଜ କୁମାର ନିର୍ବାଚନ କମିଶନଙ୍କୁ ପତ୍ର ଲେଖି ଅଭିଯୋଗ କରିଛନ୍ତି ଯେ ଜେଲରେ ଥାଇ ମଧ୍ୟ ଲାଲୁ ଲୋକସଭା ନିର୍ବାଚନ ପାଇଁ ଦଳୀୟ ପ୍ରାର୍ଥୀମାନଙ୍କୁ ନିଜ ସ୍ଵାକ୍ଷରରେ ଟିକେଟ ବାଣ୍ଟିଛନ୍ତି। ସେ କଣ ଏପରି କରିବା ପାଇଁ ଅଦାଲତଙ୍କ ଅନୁମତି ନେଇଛନ୍ତି କି ବୋଲି ଜେଡିୟୁ କମିଶନଙ୍କୁ ପ୍ରଶ୍ନ କରିଛି।
ଜେଡିୟୁ ଆହୁରି ମଧ୍ୟ ଅଭିଯୋଗ କରି କହିଛି ଯେ, ଲାଲୁ କୌଣସି ଜନ ଆନ୍ଦୋଳନର ନେତା ନୁହନ୍ତି, ସେ ଭାରତୀୟ ଦଣ୍ଡ ବିଧି ଆଇନ ଅନୁଯାୟୀ ଗୋ ଚାରା ଦୁର୍ନୀତିରେ ଜେଲ ଦଣ୍ଡ ଭୋଗୁଛନ୍ତି ତେଣୁ ସେ କିପରି ନିଜ ସମ୍ପର୍କୀୟଙ୍କ ବ୍ୟତୀତ ଦଳୀୟ ଲୋକଙ୍କୁ ସାକ୍ଷାତ କଲେ। ଅନ୍ୟ ପକ୍ଷରେ ଜେଲ ମାନୁଆଲ ଅନୁଯାୟୀ ଜେଲ ଦଣ୍ଡ ଭୋଗୁଥିବା ଅପରାଧୀ ସାକ୍ଷାତ ସମୟରେ ରାଜନୀତି ସମ୍ପର୍କିତ କଥାବାର୍ତ୍ତା କରି ପାରିବେ ନାହିଁ ବୋଲି ନିୟମ ରହିଛି।
Comments are closed.