ଇଟାନଗର : ଅରୁଣାଚଳ ପ୍ରଦେଶର ସିୟାଙ୍ଗ ଜିଲାରେ ଶୁକ୍ରବାର ମାଟି ଅତଡ଼ା ଖସି ୪ ଯବାନଙ୍କ ମୃତ୍ୟୁ ଘଟିଥିବାବେଳେ ୮ ଜଣ ଆହତ ହୋଇଛନ୍ତି। ସୂଚନା ଅନୁସାରେ ଆଇଟିବିପିର ୨୦ ଯବାନଙ୍କୁ ନେଇ ଏକ ବସ୍ ସିୟାଙ୍ଗ ଜିଲାର ଲିକାବଲି ଅଞ୍ଚଳର ବାସର-ଅକଜାନ ରାସ୍ତାରେ ଯାଉଥିବାବେଳେ ମାଟି ଅତଡ଼ା ସହ ବଡ଼ ପଥର ଖସି ବସ୍ ଉପରେ ପଡିଥିଲା। ଏଥିରେ ୪ ଯବାନଙ୍କ ମୃତ୍ୟୁ ଘଟିଛି ଓ ୮ ଯବାନ ଆହତ ହୋଇଛନ୍ତି ବୋଲି ଅରୁଣାଚଳ ପୁଲିସ୍ ସୂଚନା ଦେଇଛି। ଆହତଙ୍କ ମଧ୍ୟରୁ ୨ ଯବାନଙ୍କ ଅବସ୍ଥା ଗୁରୁତର ରହିଛି। ଦିନ ସାଢେ ୨ଟା ବେଳେ ଯବାନମାନେ ଆଇଟିବିପି ମୁଖ୍ୟ କାର୍ଯ୍ୟାଳୟରୁ ବାହାରିଥିଲେ। ସପ୍ତାହେ ହେବ ବର୍ଷା ଜାରି ରହିଥିବାରୁ ଅରୁଣାଚଳ ପ୍ରଦେଶର ବିଭିନ୍ନ ସ୍ଥାନରେ ଛୋଟ ବଡ଼ ଅତଡ଼ା ଖସୁଥିବାର ଖବର ଆସୁଛି। ଏହା ପୂର୍ବରୁ ଜୁନ୍ ୨୪ରେ ମାଟି ଅତଡ଼ା ଖସି ୫ ଶ୍ରମିକଙ୍କ ମୃତ୍ୟୁ ଘଟିଥିଲା।
