ବେଙ୍ଗାଲୁରୁ: କର୍ନାଟକର ୩ ଜଣ ମନ୍ତ୍ରୀଙ୍କ ଘନିଷ୍ଠ ସହଯୋଗୀଙ୍କ ଘରେ ମଙ୍ଗଳବାର ଆୟକର ବିଭାଗ ପକ୍ଷରୁ ଚଢ଼ାଉ କରାଯାଇଛି। ଆର୍ଥିକ ଅନିୟମିତତା ଅଭିଯୋଗରେ ମାଣ୍ଡ୍ୟା ଏବଂ ହସନ ଅଞ୍ଚଳରେ ଏହି ଚଢ଼ାଉ କରାଯାଇଥିବା ଜଣାପଡ଼ିଛି।
ରାଜ୍ୟର ମନ୍ତ୍ରୀ ସି.ଏସ. ପୁଟ୍ଟରାଜୁଙ୍କ ସହଯୋଗୀ ଥିବା ଜଣେ ଠିକାଦାରଙ୍କ ଘରେ ଚଢ଼ାଉ କରାଯାଇଛି। ସେହିପରି ହସନ ଅଞ୍ଚଳରେ ମନ୍ତ୍ରୀ ରେବାନ୍ନାଙ୍କ ଜଣେ ସହଯୋଗୀଙ୍କ ଘରେ ଚଢ଼ାଉ କରାଯାଇଛି। ଏହାବ୍ୟତୀତ ପରିବହନ ମନ୍ତ୍ରୀ ଡି.ସି. ଥାମ୍ମାନ୍ନାଙ୍କ ସହଯୋଗୀ ଘରେ ମଧ୍ୟ ଆୟକର ଅଧିକାରୀମାନେ ଚଢ଼ାଉ କରିଛନ୍ତି। ତେବେ ୨ୟ ପର୍ଯ୍ୟାୟ ନିର୍ବାଚନ ପୂର୍ବରୁ ଏହି ଚଢ଼ାଉ କରାଯାଇଥିବାରୁ ଜେଡିଏସ ଏବଂ କଂଗ୍ରେସ କେନ୍ଦ୍ର ସରକାରଙ୍କୁ ସମାଲୋଚନା କରାଯିବା ସହ ନିର୍ବାଚନ ବୈତରଣୀ ପାର ହେବାକୁ ବିଜେପି ସରକାର ଆୟକର ବିଭାଗକୁ ବ୍ୟବହାର କରୁଛି ବୋଲି କହିଛନ୍ତି।
