ଜୟପୁର: ଆଇପିଏଲ୍ରେ ଶନିବାର ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆର୍ସିବି)ର ବିରାଟ କୋହଲି ପୂରା ୨୦ ଓଭର ଖେଳି ଅପରାଜିତ ଶତକ ହାସଲ କରିଥିଲେ। ହେଲେ ତାଙ୍କ ୮ମ ଆଇପିଏଲ୍ ଶତକ ଆର୍ସିବିକୁ ଜିତାଇ ପାରିନାହିଁ। ଜୋସ୍ ବଟ୍ଲରଙ୍କ ଅପରାଜିତ ଓ ସଞ୍ଜୁ ସାମ୍ସନଙ୍କ ଅର୍ଦ୍ଧଶତକ ବଳରେ ଆର୍ସିବିକୁ ୬ ୱିକେଟ୍ରେ ରାଜସ୍ଥାନ ପରାସ୍ତ କରିଛି। ଆର୍ସିବି ୩ ୱିକେଟରେ ୧୮୩ ରନ୍ କରିଥିଲା। ପରେ ୧୯.୧ ଓଭରରେ ୪ ୱିକେଟ୍ ହରାଇ ରାଜସ୍ଥାନ ଜିତି ନେଇଥିଲା। ପ୍ରଥମ ୪ଟିଯାକ ମ୍ୟାଚ୍ ଜିତି ୮ ପଏଣ୍ଟ ସହ ରାଜସ୍ଥାନ ଶୀର୍ଷକୁ ଉଠିଛି। ଆର୍ସିବି ୫ମ ମ୍ୟାଚ୍ରେ ୪ର୍ଥ ପରାଜୟ ଭୋଗିଛି।
୧୮୪ ରନ୍ରେ ବ୍ୟାଟିଂ କରିଥିବା ରାଜସ୍ଥାନ ରୟାଲ୍ସ ଇନିଂସର ୨ୟ ବଲ୍ରେ ଯଶସ୍ବୀ ଜୟସୱାଲଙ୍କ ୱିକେଟ ହରାଇଥିଲା। ପରେ ଓପ୍ନର ଜୋସ୍ ବଟ୍ଲର ଓ ଅଧିନାୟକ ସଞ୍ଜୁ ସାମ୍ସନ ଚମତ୍କାର ବ୍ୟାଟିଂ କରିଥିଲେ। ୬ ଓଭରର ପାୱରପ୍ଲେରେ ରାଜସ୍ଥାନ ୫୪ ରନ୍ କରିଥିଲା। ଆର୍ସିବିର ଫିଲ୍ଡର ଏକାଧିକ କ୍ୟାଚ୍ ଛାଡ଼ିଥିଲେ; ଯାହା ମହଙ୍ଗା ପଡ଼ିଥିଲା। ଚଳିତ ସଂସ୍କରଣରେ ପ୍ରଥମଥର ବଟ୍ଲରଙ୍କ ବ୍ୟାଟ୍ ଚାଲିଥିଲା। ଦୁହେଁ ଚୌକା ଓ ଛକା ମାରି ଦଳକୁ ବିଜୟ ଆଡ଼କୁ ନେଇ ଯାଇଥିଲେ। ୧୦ ଓଭରରେ ଦୁହେଁ ୯୫ ରନ୍ କରିଥିଲେ। ୧୪.୪ ଓଭରରେ ୧୪୮ ରନ୍ର ଭାଗୀଦାରି ପରେ ସାମ୍ସନ ଆଉଟ୍ ହୋଇଥିଲେ। ସଞ୍ଜୁ ସାମ୍ସନ ୪୨ ବଲ୍ରୁ ୨ଟି ଛକା ଓ ୮ଟି ଚୌକା ସହ ୬୯ ରନ୍ କରିଥିଲେ। ରିୟାନ୍ ପରାଗ ୪ ଓ ଧ୍ରୁବ ଜୁରେଲ୍ ୨ ରନ୍କରି ବିଦାୟ ନେଇଥିଲେ। ବଟ୍ଲର ଓ ସିମ୍ରନ୍ ହେତ୍ମେୟର ଦଳକୁ ବିଜୟଲକ୍ଷ୍ୟରେ ପହଞ୍ଚାଇଥିଲେ। ୧ ରନ୍ ଆବଶ୍ୟକ ଥିବା ବେଳେ ବଟ୍ଲର ଛକାମାରି ଶତକ ପୂରଣ କରିଥିଲେ। ବଟ୍ଲର ୫୮ ବଲ୍ରୁ ୪ଟି ଛକା ଓ ୯ଟି ଚୌକା ସହ ୧୦୦ ରନ୍କରି ଅପରାଜିତ ଥିଲେ। ହେତ୍ମେୟର ୧୧ ରନ୍ରେ ଅପରାଜିତ ଥିଲେ।
ରାଜସ୍ଥାନ ରୟାଲ୍ସ ଟସ୍ ଜିତି ଫିଲ୍ଡିଂ ନେଇଥିଲା। ଆର୍ସିବିର ଦୁଇ ଅଭିଜ୍ଞ ଓପ୍ନର ବିରାଟ କୋହଲି ଓ ଅଧିନାୟକ ଫାଫ୍ ଡୁ ପ୍ଲେସି ଚମତ୍କାର ବ୍ୟାଟିଂ କରିଥିଲେ। ଏହି ଭାଗୀଦାରିରେ ପ୍ରାଧାନ୍ୟ ବିସ୍ତାର କରିଥିଲେ ଫର୍ମରେ ଥିବା କୋହଲି। ୬ ଓଭରର ପାୱରପ୍ଲେରେ ଆର୍ସିବି ୫୩ ରନ୍ କରି ପାରିଥିଲା। ବିରାଟ କୋହଲି ୩୯ ବଲ୍ରେ ଅର୍ଦ୍ଧଶତକ ପୂରଣ କରିଥିଲେ। ଫାଫ୍ ଡୁ ପ୍ଲେସି ୪୨ ରନ୍ କରିଥିବା ବେଳେ ତାଙ୍କର କ୍ୟାଚ୍ ଛାଡ଼ିଥିେଲ ଟ୍ରେଣ୍ଟ ବୋଲ୍ଟ। ପରବର୍ତ୍ତୀ ବଲ୍ରେ ଡୁ ପ୍ଲେସି ଆଉଟ୍ ହୋଇ ଯାଇଥିଲେ। ୧୪ଶ ଓଭରରେ ୧୨୫ ରନ୍ର ଓପ୍ନିଂ ଭାଗିଦାରୀ ପରେ ଫାଫ୍ ଡୁ ପ୍ଲେସି ୩୩ ବଲ୍ରୁ ୨ଟି ଲେଖାଏଁ ଛକା ଓ ଚୌକା ସହ ୪୪ ରନ୍କରି ବିଦାୟ ନେଇଥିଲେ। ଖରାପ ଫର୍ମ ଅବ୍ୟାହତ ରଖି ଗ୍ଲେନ୍ ମ୍ୟାକ୍ସୱେଲ ୧ ରନ୍କରି ଆଉଟ୍ ହୋଇଥିଲେ। ବିରାଟ କୋହଲି ୬୭ ବଲ୍ରେ ଶତକ ପୂରଣ କରିଥିଲେ। ଆଇପିଏଲ୍ରେ ସର୍ବାଧିକ ଶତକ ମାରିଥିବା କୋହଲି ତାଙ୍କ କୀର୍ତ୍ତିମାନକୁ ଆଗକୁ ବଢ଼ାଇ ୮ମ ଶତକ ହାସଲ କରିଥିଲେ। କୋହଲି ୭୨ ବଲ୍ରୁ ୪ଟି ଛକା ଓ ୧୨ଟି ଚୌକା ସହ ୧୧୩ ରନ୍କରି ଅପରାଜିତ ଥିଲେ। ୟୁଜବେନ୍ଦ୍ର ଚହଲ ୨ଟି ୱିକେଟ ପାଇଥିଲେ।
