ଜାକର୍ତ୍ତା : ଭାରତର ପ୍ରମୁଖ ପୁରୁଷ ଖେଳାଳି କିଦାମ୍ବି ଶ୍ରୀକାନ୍ତ ଏଠାରେ ଚାଲିଥିବା ଇଣ୍ଡୋନେସିଆ ଓପନ ବ୍ୟାଡମିଣ୍ଟନ ଟୁର୍ଣ୍ଣାମେଣ୍ଟରେ ପ୍ରଥମ ରାଉଣ୍ଡରୁ ବିଦାୟ ନେଇଥିବାବେଳେ ମହିଳା ସିଙ୍ଗଲ୍ସରେ ପିଭି ସିନ୍ଧୁ ପରବର୍ତ୍ତୀ ରାଉଣ୍ଡରେ ପ୍ରବେଶ କରିଛନ୍ତି। ବୁଧବାର ଖେଳାଯାଇଥିବା ପୁରୁଷ ସିଙ୍ଗଲ୍ସ ପ୍ରଥମ ରାଉଣ୍ଡରେ ଜାପାନର କେନ୍ତୋ ମୋମୋତା ୧୨-୨୧, ୨୧-୧୪, ୨୧-୧୫ ଗେମରେ ଶ୍ରୀକାନ୍ତଙ୍କୁ ପରାସ୍ତ କରିଛନ୍ତି। ଏହି ମୁକାବିଲା ଏକ ଘଣ୍ଟା ଧରି ଚାଲିଥିଲା।
ଅପରପକ୍ଷରେ ମହିଳା ସିଙ୍ଗଲ୍ସରେ ୩ୟ ସିଡ୍ ମାନ୍ୟତାପ୍ରାପ୍ତ ସିନ୍ଧୁ ପ୍ରାୟ ଏକ ଘଣ୍ଟାର ମୁକାବିଲା ପରେ ଥାଇଲାଣ୍ଡର ପର୍ନପାୱି ଚୋଚୁୱଙ୍ଗ୍ଙ୍କୁ ୨୧-୧୫, ୧୯-୨୧, ୨୧-୧୩ ଗେମରେ ପରାସ୍ତ କରିଛନ୍ତି। ଦ୍ୱିତୀୟ ରାଉଣ୍ଡରେ ସିନ୍ଧୁ ଜାପାନର ଆୟା ଓହୋରିଙ୍କୁ ଭେଟିବେ। ଅପରପକ୍ଷରେ ବୁଧବାର ଭାରତୀୟ ଡବଲ୍ସ ଯୋଡିଙ୍କୁ ନିରାଶ ହେବାକୁ ପଡିଛି। ପୁରୁଷ ଡବଲ୍ସ ପ୍ରଥମ ରାଉଣ୍ଡରେ ଚୀନର ଲିନ୍ ଚେଙ୍ଗ୍ ଓ ଝାଙ୍ଗ୍ ନାନ୍ ୧୫-୨୧, ୨୧-୧୫, ୨୧-୧୭ ଗେମରେ ଭାରତୀୟ ଯୋଡି ମନୁ ଅତ୍ରି ଓ ସୁମିତ ରେଡ୍ଡିଙ୍କୁ ପରାସ୍ତ କରିଥିବାବେଳେ ମିକ୍ସଡ ଡବଲ୍ସ ପ୍ରଥମ ରାଉଣ୍ଡରେ ୪ର୍ଥ ସିଡ୍ ଚୀନର ଝେଙ୍ଗ୍ ସିୱେଇ ଓ ହୁଆଙ୍ଗ୍ ୟାକ୍ଲଙ୍ଗ୍ ୨୧-୧୨, ୨୧-୧୪ ଗେମରେ ଭାରତର ପ୍ରଣବ ଚୋପ୍ରା ଓ ସିକ୍କି ରେଡ୍ଡିଙ୍କୁ ହରାଇଛନ୍ତି।
