ୱାଶିଂଟନ୍ : ଆମେରିକାର କାନ୍ସାସ୍ ସହରଠାରେ ଭାରତୀୟ ଛାତ୍ର ଶରତ କୋପୁଙ୍କ ହତ୍ୟା ଘଟଣାରେ ସମ୍ପୃକ୍ତ ଜଣେ ଅପରାଧୀ ସ୍ଥାନୀୟ ପୁଲିସଗୁଳିରେ ପ୍ରାଣ ହରାଇଛି। ରବିବାର ଏହି ଅପରାଧୀକୁ ପୁଲିସ ଅଧିକାରୀମାନେ ଦେଖି ତା’ ନିକଟରେ ପହଞ୍ଚିଥିଲେ; ମାତ୍ର ସନ୍ଦିଗ୍ଧ ଅପରାଧୀ ଜଣକ ସେମାନଙ୍କ ଉପରକୁ ଗୁଳିମାଡ଼ କରି ଘଟଣାସ୍ଥଳରୁ ଖସି ପଳାଇବାକୁ ଉଦ୍ୟମ କରିଥିଲା। ଫଳରେ ସେଠାରେ ଉଭୟପକ୍ଷ ମଧ୍ୟରେ ଗୁଳିବିନିମୟ ହୋଇଥିଲା। ସନ୍ଦିଗ୍ଧ ଅପରାଧୀ ପୁଲିସ ଗୁଳିରେ ଟଳିପଡିଥିବା ବେଳେ ଅନ୍ୟ ୩ ଜଣ ଅଧିକାରୀ ଆହତ ହୋଇଛନ୍ତି। ତଦନ୍ତର ଗୋପନୀୟତା କାରଣରୁ ମୃତ ସନ୍ଦିଗ୍ଧ ଅପରାଧୀର ନାମ ପୁଲିସ ପ୍ରକାଶ କରିନାହିଁ। କାନ୍ସାସ୍ ସିଟିର ଏକ ରେସ୍ତୋରାଁରେ ପାର୍ଟଟାଇମ୍ କାମ କରୁଥିବା କୋପୁଙ୍କୁ ଜୁଲାଇ ୬ରେ କିଛି ଲୋକ ପଛରୁ ଗୁଳି କରି ହତ୍ୟା କରିଥିଲେ।
