ବନ୍ୟା ଜଳରେ ହୀରାକୁଦ ଜଳ ଭଣ୍ଡାରକୁ ଉପରମୁଣ୍ଡରୁ ଭାସି ଆସିଲା ଏକ ଗାଁ, ଦେଖନ୍ତୁ ଭିଡିଓ…

ହୀରାକୁଦ : ରାଜ୍ୟରେ ଲଗୁଚାପ ଜନିତ ବର୍ଷା ଏବଂ ମହାନଦୀର ଉପରମୁଣ୍ଡ ଛତିଶଗଡରେ ପ୍ରବଳ ବର୍ଷା କାରଣରୁ ହୀରାକୁଦ ଜଳ ଭଣ୍ଡାରରେ ଜଳସ୍ତର ବୃଦ୍ଧି ପାଇଥିଲା। ଯାହା ଫଳରେ ହୀରାକୁଦ ଜଳ ଭଣ୍ଡାରର ୪୬ ଟି ଗେଟ୍‌ ଖୋଲା ଯାଇଥିଲା। କିନ୍ତୁ ବର୍ତ୍ତମାନ ଉପରମୁଣ୍ଡରେ ବର୍ଷାର ପରିମାଣ କମିବା ସହ ହୀରାକୁଦ ଜଳ ଭଣ୍ଡାରର ଜଳସ୍ଥର ମଧ୍ୟ ହ୍ରାସ ପାଇଛି। ଯାହା ଫଳରେ ଜଳ ଭଣ୍ଡାରର ୧୦ ଟିଗେଟ୍ ବନ୍ଦ କରାଯାଇଥିବା ବେଳେ ମୋଟ୍ ୩୬ ଟି ଗେଟ୍ ଦେଇ ବନ୍ୟା ଜଳ ନିଷ୍କାସନ କରାଯାଉଛି।

ତେବେ ହୀରାକୁଦ ଜଳ ଭଣ୍ଡାରରକୁ ମହାନଦୀର ଉପରମୁଣ୍ଡ ଛତିଶଗଡରୁ ଏକ ସମ୍ପୁର୍ଣ୍ଣ ଗାଁ ଭାସି ଆସିଥିବା ଦେଖିବାକୁ ମିଳିଛି। ଆଜି ସକାଳେ ଜଳ ଭଣ୍ଡାରେ ଗ୍ୟାସ ସିଲିଣ୍ଡରଠୁ ଆରମ୍ଭ କରି ବିଭିନ୍ନ ବାସନ ଏବଂ ଘରର ଚାଳ ଛପର ଭାସି ଆସି ଲାଗିଥିବା ଦେଖିବାକୁ ମିଳିଥିଲା। କେବଳ ଏତିକି ନୁହେଁ ଭାସି ଆସିଥିବା ଗାଁର ପ୍ରାୟ ୭୦ରୁ ଉର୍ଦ୍ଧ ଗୃହପାଳିତ ପଶୁଙ୍କ ମୃତ ଦେହ ମଧ୍ୟ ହୀରାକୁଦ ଜଳଭଣ୍ଡାରରେ ଲାଗିଛି। ମୃତ ଗୃହପାଳିତ ପଶୁଙ୍କ ମଧ୍ୟରେ ଗାଈ,ଛେଳି ରହିଥିବା ଦେଖାଯାଇଛି। ସ୍ବଭାଗ୍ୟବସତଃ ଭାସିଆସିଥିବା ଗୃହପାଳିତ ପଶୁଙ୍କ ମଧ୍ୟରେ ଦୁଇଟି ଗାଈ ଜୀବନ୍ତ ଥିବା ସ୍ଥାନୀୟ ଲୋକ ଦେଖିବାପରେ ଅଗ୍ନିଶମ ବାହିନୀଙ୍କୁ ଖବର ଦେଇଥିଲେ। ଅଗ୍ନିଶମ ବାହିନୀ ଜଳଭଣ୍ଡାରରୁ ୨ ଜୀବନ୍ତ ଗାଈଙ୍କୁ ଉଦ୍ଧାର କରିଥିବା ଜଣାପଡିଛି।