ହିଞ୍ଜିଳିକାଟୁ: ହିଞ୍ଜିଳି ଥାନା ଅନ୍ତର୍ଗତ ଶାସନଆମ୍ବଗାଁର ଜଣେ ନାବାଳିକାକୁ ଆକ୍ରମଣ କରିବା ପରେ ପାହାଡ଼ରୁ ତଳକୁ ପ୍ରେମିକ ଠେଲି ଦେଇଥିବା ଭଳି ସଙ୍ଗୀନ ଅଭିଯୋଗ ହିଞ୍ଜିଳି ଥାନାରେ ହୋଇଛି। ଏ ସଂକ୍ରାନ୍ତରେ ପୀଡିତା ନାବାଳିକାର ମା’ ହିଞ୍ଜିଳି ଥାନାରେ ଅଭିଯୋଗ କରିଛନ୍ତି। ଅଭିଯୋଗକାରିଣୀଙ୍କ ୧୫ ବର୍ଷୀୟା କନ୍ୟା ସେହି ଗ୍ରାମର ଜଣେ ଯୁବକଙ୍କୁ ଭଲ ପାଉଥିଲେ। ସୋମବାର ସନ୍ଧ୍ୟାରେ ଗାଁରେ ଶୀତଳ ଷଷ୍ଠୀ ଯାତ୍ରା ଚାଲିଥିବା ସମୟରେ ନାବାଳିକାକୁ ସମ୍ପୃକ୍ତ ଯୁବକ ଫେରାର ହୋଇଯିବାକୁ ପ୍ରବର୍ତ୍ତାଇ ଥିଲା। କିନ୍ତୁ ନାବାଳିକା ଏଥିରେ ରାଜି ନହେବାରୁ ଯୁବକଟି ତାଙ୍କୁ ବାଇଧର ପାହଡ଼କୁ ନେଇ ସେଠାରେ ତାଙ୍କ ହାତ କାଟି ଦେଇ ପାହାଡ ଉପରୁ ତଳକୁ ଠେଲି ଦେଇଥିବା ଅଭିଯୋଗ ହୋଇଛି। ଆହତ ନାବାଳିକାକୁ ଅଚେତ ଅବସ୍ଥାରେ ପରିବାର ଲୋକେ ଉଦ୍ଧାର କରି ହିଞ୍ଜିଳିକାଟୁ ଡାକ୍ତରଖାନା ଓ ପରେ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ପୁଲିସ ମାମଲା ରୁଜୁ ସହ ନାବାଳିକାକୁ ପଚରାଉଚରା କରି ଘଟଣାର ପ୍ରକୃତ ଖିଅ ବାହାର କରିବାକୁ ତଦନ୍ତ ଜାରି ରଖିଛି। ଗ୍ରାମର ଜଣେ ଯୁବକକୁ ଅଟକ ରଖି ପୁଲିସ ପଚରାଉଚରା କରୁଥିବା ହିଞ୍ଜିଳି ଥାନା ପକ୍ଷରୁ ସୂଚନା ମିଳିଛି।
Comments are closed.