ଗୋପାଳପୁର: ରଙ୍ଗେଇଲୁଣ୍ଡା ବ୍ଲକ ଅନ୍ତର୍ଗତ କୋଳିଥି ଗାଁ ଖଳା ସାହିରେ ବିଦ୍ୟୁତ ଖୁଣ୍ଟରେ ସଟ ସର୍କିଟ ଯୋଗୁଁ ନିଆଁ ବାହାରି ଖୁଣ୍ଟ ନିକଟରେ ଥିବା ଏକ ଚାଳଘର ଉପରେ ପଡି ଚାଳଘରକୁ ସମ୍ପୂର୍ଣ୍ଣ ଛାରଖାର କରି ଦେଇଛି। ଅଭିଯୋଗ ଅନୁଯାୟୀ ଜଣେ ଅବିବାହିତା ତଥା ଦିନ ମଜୁରିଆ ଭାବେ କାମ କରୁଥିବା ଜାଡି ଦଳେଇ (୫୫) ଆଜି ସକାଳ ୯ଟା ବେଳେ କାମ କରିବା ନିମନ୍ତେ ଘରେ ତାଲା ପକାଇ ବାହାରକୁ ଚାଲି ଯାଇଥିଲେ। ଅଚାନକ ୧୦ଟା ବେଳେ ଘର ସମ୍ମୁଖରେ ଥିବା ବିଦ୍ୟୁତ ଖୁଣ୍ଟରେ ବିଦ୍ୟୁତ ସଟ ସର୍କିଟ ହୋଇ ନିଆଁ ବାହାରିଥିଲା। ଏହି ନିଆଁ ଜାଡିର ଚାଳଘରେ ପଡିବା ଫଳରେ ଘରଟି ସମ୍ପୂର୍ଣ୍ଣ ଜଳି ଯାଇଥିଲା। ଫଳରେ ଘର ମଧ୍ୟରେ ଥିବା ଆସବାବ ପତ୍ର, ଚାଉଳ ଓ ୨୦୦୦ ଟଙ୍କା ପୋଡି ନଷ୍ଟ ହୋଇ ଯାଇଥିବା ଜଣାପଡିଛି।
ଖବର ପାଇ ସରପଞ୍ଚ ଜଗମୋହନ ପାତ୍ର ଘଟଣା ସ୍ଥଳରେ ପହଞ୍ଚି ଅନ୍ୟ ଯୁବକମାନଙ୍କ ସହାୟତାରେ ନିଆଁକୁ ଆୟତ୍ତ କରିବାକୁ ଚେଷ୍ଟା କରିବା ସହ ଅଗ୍ନିଶମ ବିଭାଗକୁ ଖବର ଦେଇଥିଲେ। ଅଗ୍ନିଶମ ବିଭାଗ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିବା ବେଳକୁ ଘରଟି ସମ୍ପୂର୍ଣ୍ଣ ପୋଡ଼ି ପାଉଁଶ ହୋଇ ଯାଇଥିଲା। ଏହି ଘଟଣା ପରେ ବ୍ଲକ ପ୍ରଶାସନ ପକ୍ଷରୁ ରେଡକ୍ରସ ସହାୟତା ପାଣ୍ଠିରୁ ବିଡିଓ ପ୍ରସନ୍ନ କୁମାର ପାତ୍ର ସହାୟତା ପ୍ରଦାନ କରିଛନ୍ତି।
