ଗୋପାଳପୁର : ଜୁଆ ଆଡ୍ଡା ଉପରେ ପୁଲିସ ଚଡ଼ାଉ ସମୟରେ ପୁଲିସକୁ ଆକ୍ରମଣ କରିବା ଘଟଣାରେ ଗୁରୁବାର ଫେରାର ଅଭିଯୁକ୍ତକୁ ଗୋଳନ୍ଥରା ଥାନା ପୁଲିସ ଗିରଫ କରି ଅଦାଲତ ଚାଲାଣ କରିଛି । ଗିରଫ ଅଭିଯୁକ୍ତ ଜଣକ ହେଲେ ଇଚ୍ଛାପୁର ଥାନା ଅଧିନସ୍ଥ ପୁସ୍ତପୁର ଗ୍ରାମର ପି . ଜାନକୀ ରାମ (୨୭) । ଘଟଣା ପରଠାରୁ ଜାନକୀ ଫେରାର ଥିବା ବେଳେ ଗୁରୁବାର ପୁଲିସ ଖବର ପାଇଁ ତାଙ୍କ ଗ୍ରାମରେ ଚଡ଼ାଉ କରି କାବୁ କରିବା ସହ ସନ୍ଧ୍ୟାରେ ଜାନକୀକୁ ପୁଲିସ ଗିରଫ କରି ଅଦାଲତ ଚାଲାଣ କରିଛି । ସୂଚନା ଅନୁସାରେ ଏହି ଥାନା ଅଧିନସ୍ଥ ଝାଟିପଦର ଗ୍ରାମ ନିକଟରେ ଥିବା ଜଙ୍ଗଲର କିଆଁ ବାଡ଼ରେ କିଛି ଦିନ ହେଲା ଜୁଆ ଆଡ଼ ଚାଲୁଥିଲା । ଗତ ଜୁନ ୫ ତାରିଖରେ ପୁଲିସ ବିଶ୍ବସ୍ଥ ସୂତ୍ରରୁ ଖବର ପାଇ ଥାନା ଅଧିକାରୀ ବିବେକାନନ୍ଦ ମହନ୍ତ ଓ ଅନ୍ୟ ପୁଲିସ କର୍ମଚାରୀ ଜୁଆ ଆଡ଼ ଉପରେ ଛାପା ମାରିଥିଲା। ସେହି ସମୟରେ ତିନିରୁ ଚାରି ଜଣ ଜୁଆଡି ପୁଲିସକୁ ଗାଳି ଗୁଲଜ, କାର୍ଯ୍ୟରେ ବାଧା ଦେବା ସହ କନଷ୍ଟେବଳ ସଂଜୀବ ଭୂୟାଁ ଓ ସୁନୀଲ ନାୟକଙ୍କୁ ଆକ୍ରମଣ କରି ଘଟଣା ସ୍ଥଳରୁ ଫେରାର ହେବାରେ ସକ୍ଷମ ହୋଇଥିଲେ। ଅନ୍ୟ ପଟେ ପୁଲିସ ସେମାନଙ୍କ ମଧ୍ୟରୁ ତିନି ଜଣଙ୍କୁ କାବୁ କରିଥିଲା । ସେମାନଠାରୁ ଏକ ଲକ୍ଷ ୪୪ ହଜାର ୫ ଶହ ୭୦ ଟଙ୍କା ଓ ତାସ ପକେଟ ଓ ୪ଟି ବାଇକ ଜବତ କରିଥିଲା । ଏ ନେଇ ଥାନାରେ ୨୬୦/୨୩ ରେ ପୁଲିସକୁ ହତ୍ୟା ଉଦ୍ୟମ ମାମଲା ରୁଜୁ କରିବା ସହ ୩ ଅଭିଯୁକ୍ତକୁ ଅଦାଲତ ଚାଲାଣ କରିଥିଲା। ଆଜି ଆଉ ଜଣେ ଅଦାଲତ ଚାଲାଣ ପରେ ଏହି ମାମଲାରେ ଗିରଫଦାରୀ ସଂଖ୍ୟା ୪କୁ ବୃଦ୍ଧି ପାଇଛି।
Comments are closed.