ପାଣାଜୀ : ବିଜେପି ନେତୃତ୍ବ ଗୋଆର ମେଣ୍ଟ ସରକାରରୁ ସହଯୋଗୀ ଗୋଆ ଫରୱାର୍ଡ ପାର୍ଟି (ଜିଏଫପି)ର ତିନି ମନ୍ତ୍ରୀଙ୍କୁ ଇସ୍ତଫା ଦେବା ଲାଗି ମୁଖ୍ୟମନ୍ତ୍ରୀ ପ୍ରମୋଦ ସାୱନ୍ତ ଶୁକ୍ରବାର ନିର୍ଦେଶ ଦେଇଛନ୍ତି। ଜିଏଫପିରୁ ଉପମୁଖ୍ୟମନ୍ତ୍ରୀ ଥିବା ବିଜୟ ସରଦେଶାଇଙ୍କୁ ମଧ୍ୟ ଇସ୍ତଫା ଦେବାକୁ କୁହାଯାଇଛି। ତାଙ୍କ ସ୍ଥାନରେ ବିଜେପିରେ ନୂଆ କରି ଯୋଗ ଦେଇଥିବା କଂଗ୍ରେସ ନେତା ଚନ୍ଦ୍ରକାନ୍ତ କାଭଲେକରଙ୍କୁ ଉପମୁଖ୍ୟମନ୍ତ୍ରୀ କରାଯିବ। ଜିଏଫପିର ତିନି ମନ୍ତ୍ରୀଙ୍କ ସହିତ ମନ୍ତ୍ରୀ ଥିବା ସ୍ବାଧୀନ ବିଧାୟକ ରୋହନ ଖାଉନ୍ତେଙ୍କୁ ମଧ୍ୟ ଇସ୍ତଫା ଦେବାକୁ କୁହାଯାଇଛି। ଏହି ମନ୍ତ୍ରୀଙ୍କ ସ୍ଥାନରେ କଂଗ୍ରେସରୁ ଆସି ବିଜେପିରେ ଯୋଗଦେଇଥିବା ୪ ବିଧାୟକଙ୍କୁ ମନ୍ତ୍ରୀ କରାଯିବ। ଶନିବାର ଅପରାହ୍ଣ ୩ଟାରେ ନୂଆ ମନ୍ତ୍ରୀମାନେ ଶପଥ ନେବେ। ତେବେ ଏ ସମ୍ପର୍କରେ ଜିଏଫପି ପକ୍ଷରୁ ବିଧିବଦ୍ଧ ଭାବେ କୌଣସି ଜବାବ ଦିଆଯାଇ ନାହିଁ। ମୁଖ୍ୟମନ୍ତ୍ରୀଙ୍କ ଠାରୁ ସରକାରୀ ଭାବେ ସେମାନେ କୌଣସି ନିର୍ଦେଶ ପାଇ ନାହାନ୍ତି ବୋଲି ସମ୍ପୃକ୍ତ ମନ୍ତ୍ରୀମାନେ କହିଛନ୍ତି। ଉପମୁଖ୍ୟମନ୍ତ୍ରୀ ସରଦେଶାଇ କହିଛନ୍ତି ଯେ ଜିଏଫପି ବିଜେପି ନେତୃତ୍ବ ଏନଡିଏର ଅଂଶୀଦାର ରହିଛି। ବିଜେପିର କେନ୍ଦ୍ରୀୟ ନେତାଙ୍କ ସହିତ ଆଲୋଚନା ପରେ ଜିଏଫପି ଗୋଆ ରାଜ୍ୟ ସରକାରରେ ସାମିଲ ହୋଇଥିଲା। ବର୍ତ୍ତମାନ ପରିସ୍ଥିତି ବାବଦରେ ବିଜେପି କେନ୍ଦ୍ରୀୟ ନେତାଙ୍କ ସହିତ କୌଣସି ଆଲୋଚନା ହୋଇ ନାହିଁ। ଆଲୋଚନା ପରେ ଯାହା ନିଷ୍ପତ୍ତି ନିଆଯିବ। ଦୁଇଦିନ ତଳେ ଗୋଆ କଂଗ୍ରେସର ୧୦ ବିଧାୟକ ବିଜେପିରେ ଯୋଗ ଦେଇଥିଲେ।
Popular Categories
Previous article
Next article