ପିପିଲି: ଭୁବନେଶ୍ୱର-ପୁରୀ ଜାତୀୟ ରାଜପଥର ଦାଣ୍ଡମୁକୁନ୍ଦପୁର ନିକଟ ଭୋଗୁଆବାଙ୍କ ଛକରୁ ଏକ ଏଲ୍ପିଜି ସିଲିଣ୍ଡର ବୋଝେଇ ଟ୍ରକ୍ରୁ ଚୋରି ହୋଇଥିବା ୩୦ଟି ଗ୍ୟାସ ଭର୍ତ୍ତି ସିଲିଣ୍ଡରକୁ ପିପିଲି ପୁଲିସ ବୁଧବାର ଅପରାହ୍ନରେ ଜବତ କରିବାରେ ସକ୍ଷମ ହୋଇଛି। ସୂଚନା ଅନୁଯାଇ, ଗତ ୩ତାରିଖ ରାତିରେ ଜଟଣୀରୁ ଏକ ଟ୍ରକରେ (ଓଆର୍୦୯ଏଲ୍ ୦୯୦୧) ଏଚ୍ପି କମ୍ପାନୀର ଏଲ୍ପିଜି ସିଲିଣ୍ଡର ପୁରୀ ଅଭିମୁଖେ ଯାଉଥିଲା। ତେବେ ପିପିଲି ଥାନା ଅନ୍ତର୍ଗତ ଦାଣ୍ଡମୁକୁନ୍ଦପୁର ନିକଟ ଭୋଗୁଆବାଙ୍କ ଛକଠାରେ ଜାତୀୟ ରାଜପଥ କଡରେ ଗାଡିକୁ ରଖି ଡ୍ରାଇଭର ବିଶ୍ରାମ ନେଉଥିବା ବେଳେ ବିଳମ୍ବିତ ରାତିରେ ଉକ୍ତ ଗାଡିରୁ ଗ୍ୟାସ୍ ସିଲିଣ୍ଡର ଚୋରି ହୋଇଥିଲା। ୨୦ଟି କମର୍ସିଆଲ ସିଲିଣ୍ଡର (୧୯.୨କେଜି) ଓ ୧୦ଟି ଘରୋଇ ସିଲିଣ୍ଡର (୧୪.୨କେଜି)କୁ କେହି ଦୁର୍ବୁତ୍ତ ଗାଡିରୁ ଚୋରି କରି ନେଇଥିବା ସମ୍ପର୍କରେ ଗାଡିର ଡ୍ରାଇଭର ବଳରାମ ବେହେରା ପିପିଲି ପୁଲିସରେ ଲିଖିତ ଅଭିଯୋଗ କରିଥିଲେ। ଆଇଆଇସି ଶରତ କୁମାର ସାହୁଙ୍କ ନେତୃତ୍ୱରେ ଏସ୍ଆଇ ସନ୍ଦୀପ କୁମାର ଦାସ, ଏଏସ୍ଆଇ ବିନୟ କୁମାର ଦାସ, ଶେଷଦେବ ସୁବୁଦ୍ଧି ପ୍ରମୁଖ ଉକ୍ତ ଗ୍ୟାସ୍ ସିଲିଣ୍ଡର ଚୋର ରାକେଟ୍କୁ ଧରିବା ପାଇଁ ଉଦ୍ୟମ ଜାରି ରଖିଥିଲେ। ବିଶ୍ୱସ୍ତ ସୂତ୍ରରୁ ଖବର ପାଇ ପୁଲିସ ବୁଧବାର ଅପରାହ୍ନରେ ମଙ୍ଗଳପୁର ନିକଟ ଦୁର୍ଗାଦାସପୁର ପଞ୍ଚାୟତର ବଧି-ଠଣଠଣା ଗ୍ରାମରେ ଚଢାଉ କରି ଏକ ମାଟି ଘର ମଧ୍ୟରୁ ଚୋରି ଯାଇଥିବା ୩୦ଟି ଯାକ ସିଲିଣ୍ଡରକୁ ଜବତ କରିବାରେ ସକ୍ଷମ ହୋଇଛି। ଏହି ଚୋରି ଘଟଣାରେ ବ୍ୟବହୃତ ହୋଇଥିବା ଗାଡି ଓ ସମ୍ପୃକ୍ତ ଥିବା ସମସ୍ତ ଅଭିଯୁକ୍ତଙ୍କ ଠିକଣା ପୁଲିସକୁ ହସ୍ତଗତ ହୋଇଥିବା ବେଳେ ଅଭିଯୁକ୍ତମାନଙ୍କୁ ଗିରଫ କରିବା ପାଇଁ ପୁଲିସ ବିଭିନ୍ନ ସ୍ଥାନରେ ଚଢାଉ ଜାରି ରଖିଥିବା ସୂଚନା ମିଳିଛି।
