ପିପିଲି: ପିପିଲି ବ୍ଲକ ଛକ ନିକଟ ରାସ୍ତା କଡରୁ ଏକ ନବଜାତ ଶିଶୁପୁତ୍ରର ମୃତଦେହକୁ ପୁଲିସ ଜବତ କରିଛି। ଏକ ଲୁଗାରେ ଗୁଡା ହୋଇ ଶିଶୁପୁତ୍ରର ମୃତଦେହ ରାସ୍ତାକଡରେ ଥିବା ବୁଦାମୂଳରେ ପଡିଥିବାର କେତେକ ଲୋକେ ଅପରାହ୍ନରେ ଦେଖିବା ପରେ ପୁଲିସକୁ ଖବର ଦେଇଥିଲେ। ଏଏସ୍ଆଇ ବିଦ୍ୟାଧର ଭୋଳ ଘଟଣାସ୍ଥଳରେ ପହଞ୍ଚି ଉକ୍ତ ନବଜାତ ଶିଶୁପୁତ୍ରର ମୃତଦେହକୁ ଜବତ କରିଥିଲେ। ଏ ସଂପର୍କରେ ପୁଲିସରେ ଏକ ଅପମୃତ୍ୟୁ ମାମଲା ରୁଜ୍ଜୁ ହୋଇଥିବା ବେଳେ ଗୁରୁବାର ମୃତଦେହକୁ ବ୍ୟବଚ୍ଛେଦ ପାଇଁ ପୁରୀ ଡାକ୍ତରଖାନା ପଠାଯିବ। କୌଣସି ବ୍ୟକ୍ତି ଉକ୍ତ ଶିଶୁପୁତ୍ରର ମୃତଦେହକୁ ଆଣି ରାସ୍ତାକଡ ବୁଦାମୂଳରେ ରଖି ଚାଲିଯାଇଥିବାର ଅନୁମାନ କରାଯାଉଥିବା ବେଳେ ପୁଲିସ ଘଟଣାର ତଦନ୍ତ ଚଳାଇଛି।
