ପିପିଲି :ପିପିଲି ଥାନା ଅନ୍ତର୍ଗତ ହାଟସାହି ଛକ ଠାରେ ଗ୍ୟାସ ଟାଙ୍କିରୁ ନିଆଁ ଲାଗି ଏକ ଦୋକାନ ସଂପୂର୍ଣ୍ଣ ଜଳି ଯାଇଥିବା ସୂଚନା ମିଳିଛି। ଗୁରୁବାର ସଂନ୍ଧ୍ୟାରେ ବସନ୍ତ ନାୟକଙ୍କ ଗ୍ରସରୀ ଦୋକାନ ସମ୍ମୁଖରେ ଥିବା ଜଳଖିଆ ଦୋକାନର ଗ୍ୟାସ ଟାଙ୍କି କୌଣସି କାରଣରୁ ଲିକେଜ ହୋଇ ସେଥିରେ ନିଆଁ ଲାଗି ଯାଇଥିଲା। ଫଳରେ ଉକ୍ତ ଜଳଖିଆ ଦୋକାନ ସମେତ ବସନ୍ତଙ୍କ ଚାଳଛପର ଦୋକାନ ସଂପୂର୍ଣ୍ଣ ଭାବେ ଜଳି ଯାଇଥିଲା। ଦୋକାନ ମଧ୍ୟରେ ଥିବା ସମସ୍ତ ତେଜରାତି ସାମଗ୍ରୀ ସମେତ ଆସବାବପତ୍ର ଜଳି ଯାଇଥିବା ବେଳେ ସୌଭାଗ୍ୟ ବସତଃ ଏଥିରେ କେହି ଆହତ ହୋଇନାହାନ୍ତି। ଖବର ପାଇ ପିପିଲିରୁ ଦମକଳବାହିନୀ ଘଟଣା ସ୍ଥଳରେ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ନିଆଁକୁ ଆୟତ୍ତ କରିଥିଲା। ଅଗ୍ନିକାଣ୍ଡରେ କ୍ଷୟକ୍ଷତିର ପରିମାଣ ୭୦ହଜାରରୁ ଉର୍ଦ୍ଧ ହେବ ବୋଲି ସୂଚନା ମିଳିଛି।
