ଦିଶପୁର : ଆସାମରେ ବାଲ୍ୟ ବିବାହ ରୋକିବା ପାଇଁ ରାଜ୍ୟ ସରକାର ଏକ ନୂଆ ଯୋଜନା ଆରମ୍ଭ କରିଛନ୍ତି । ମୁଖ୍ୟମନ୍ତ୍ରୀ ଏକାଦଶଠୁ ଆରମ୍ଭ କରି ସ୍ନାତକୋତ୍ତର ପର୍ଯ୍ୟନ୍ତ ଛାତ୍ରୀଙ୍କ ବ୍ୟାଙ୍କ ଆକାଉଣ୍ଟରେ ପ୍ରତି ମାସରେ ୧୦୦୦ରୁ ୨୫୦୦ ଟଙ୍କା ପର୍ଯ୍ୟନ୍ତ ପଠାଇବେ । ଯୋଜନାରେ ପ୍ରାୟ ୧୦ ଲକ୍ଷ ଛାତ୍ରୀଙ୍କୁ ସାମିଲ କରାଯିବ ଏବଂ ପ୍ରଥମ ବର୍ଷରେ ଏଥିରେ ୩୦୦ କୋଟି ଟଙ୍କା ଖର୍ଚ୍ଚ କରାଯିବ ସେହିଭଳି ୫ ବର୍ଷର ଅବଧିରେ ପ୍ରାୟ ୧୫୦୦ କୋଟି ଟଙ୍କା ଖର୍ଚ୍ଚ କରାଯିବ ।
ଯୋଜନା ଅନୁସାରେ ଦଶମ ଶ୍ରେଣୀ ପାସ୍ କରୁଥିବା ଏବଂ ଏକାଦଶରେ ଆଡମିଶନ କରୁଥିବା ଛାତ୍ରୀଙ୍କୁ ଦ୍ବାଦଶ ଶ୍ରେଣୀ ପରୀକ୍ଷା ପୂରା କରିବା ପର୍ଯ୍ୟନ୍ତ ୨ ବର୍ଷ ମାସିକ ହଜାରେ ଟଙ୍କା ମିଳିବ । ଏହି ରାଶି ପ୍ରତି ମାସ ୧୧ ତାରିଖରେ ଛାତ୍ରୀଙ୍କ ବ୍ୟାଙ୍କ ଆକାଉଣ୍ଟକୁ ଆସିବ । ଦ୍ବାଦଶ ସମ୍ପୂର୍ଣ୍ଣ କରି ଡିଗ୍ରୀ କୋର୍ସରେ ଆଡମିଶନ କରୁଥିବା ଛାତ୍ରୀଙ୍କୁ ମାସିକ ୧୨୫୦ ଟଙ୍କା ମିଳିବ । ସେହିଭଳି ସ୍ନାତକୋତ୍ତର ଏବଂ ବିଏଡ କୋର୍ସରେ ଆଡମିଶନ ନେଉଥିବା ଛାତ୍ରୀଙ୍କୁ ସେମାନଙ୍କ କୋର୍ସ ସମାପ୍ତ ହେବା ପର୍ଯ୍ୟନ୍ତ ମାସିକ ୨୫୦୦ ଟଙ୍କା ମିଳିବ । ଏହା ସେମାନଙ୍କ ଆର୍ଥିକ ବୋଝକୁ ସାମାନ୍ୟ ହାଲୁକା କରିବାରେ ସହାୟକ ହେବ ।
ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ବଶର୍ମା ଯୋଜନା ଆରମ୍ଭ କରି କହିଛନ୍ତି କି ବାଲ୍ୟ ବିବାହକୁ ସମ୍ପୂର୍ଣ୍ଣ ବନ୍ଦ କରିବା ଏହାର ମୂଳ ଉଦ୍ଦେଶ୍ୟ । ୨୦୧୯-୨୧ରେ ହୋଇଥିବା ଏକ ସର୍ଭେ ରିପୋର୍ଟ ଅନୁସାରେ ୧୮ ବର୍ଷ ପୂର୍ବରୁ ଅନେକ କିଶୋରୀ ବିବାହ କରିଦେଉଛନ୍ତି । ସେମାନଙ୍କ ପିତାମାତା ତାଙ୍କ ଶିକ୍ଷା ସମାପ୍ତ ନକରି ବିବାହ କରିଦେଉଛନ୍ତି । ତେଣୁ ଏ ଦିଗରେ ପଦକ୍ଷେପ ନେବା ପାଇଁ ଏମିତି ଯୋଜନା ଆରମ୍ଭ କରାଯାଇଛି ।
