ନୂଆଦିଲ୍ଲୀ : ଭୋଟର ପରିଚୟପତ୍ର ସହିତ ଆଧାର ନମ୍ବର ସଂଯୋଗ ସମ୍ପର୍କିତ ବିଧେୟକ ସୋମବାର ଲୋକସଭାରେ ଗୃହୀତ ହୋଇଛି । ନିର୍ବାଚନ ଆଇନ (ସଂଶୋଧନ) ବିଧେୟକ ୨୦୨୧କୁ ଆଇନମନ୍ତ୍ରୀ କିରେନ ରିଜିଜୁ ଗୃହରେ ଆଗତ କରିଥିବାବେଳେ ଏହା ବାଚନିକ ଭୋଟ୍ରେ ଗୃହୀତ ହୋଇଥିଲା । ବିଧେୟକର ବ୍ୟବସ୍ଥା ଅନୁଯାୟୀ ପ୍ରତ୍ୟେକ ମତଦାତାଙ୍କ ଫଟୋ ପରିଚୟପତ୍ର (ଇପିଆଇସି)କୁ ଆଧାର ସହିତ ସଂଯୋଗ କରାଯିବ। ତେବେ ଏହି ବିଧେୟକକୁ କଂଗ୍ରେସ, ଏଆଇଏମ୍ଆଇଏମ୍, ବିଏସ୍ପି, ଡିଏମ୍କେ, ତୃଣମୂଳ କଂଗ୍ରେସ, ଶିବସେନା, ଏନସିପି ଓ ଅନ୍ୟ ବିରୋଧୀ ଦଳଗୁଡିକ ବିରୋଧ କରିଥିଲେ। ବିରୋଧୀ ଦଳଗୁଡିକ କହିଥିଲେ ଯେ ଭୋଟର ପରିଚୟପତ୍ର ସହ ଆଧାର ସଂଯୋଗ ଦ୍ବାରା ନାଗରିକଙ୍କ ସାମ୍ବିଧାନିକ ଅଧିକାର ଓ ଗୋପନୀୟତା ଅଧିକାର ଉଲ୍ଲଙ୍ଘନ ହେବ। ଆଧାର ନମ୍ବର ଜଣେ ବ୍ୟକ୍ତିର ବାସସ୍ଥାନ ପ୍ରମାଣ ପତ୍ର। ନାଗରିକତ୍ବର ପ୍ରମାଣପତ୍ର ନୁହେଁ। ଆଧାର ସହ ଭୋଟର ପରିଚୟପତ୍ର ସଂଯୋଗ ଦ୍ବାରା ଅଣନାଗରିକମାନେ ଆଇନର ଫାଇଦା ନେବା ପୂର୍ବକ ମତଦାନର ସୁଯୋଗ ନେଇପାରିବେ। ତେଣୁ ଏହି ବିଧେୟକକୁ ପ୍ରତ୍ୟାହାର କରାଯାଉ। ଓଡ଼ିଶାର ବିଜୁ ଜନତା ଦଳ (ବିଜେଡି) ଯେପରି ଢଙ୍ଗରେ ବିଧେୟକକୁ ଆଗତ କରି ଗୃହୀତ କରାଗଲା ତାକୁ ବିରୋଧ କରିଥିଲା। ବିରୋଧୀଙ୍କ ଦାବିକୁ ଅଗ୍ରାହ୍ୟ କରି ମନ୍ତ୍ରୀ ରିଜିଜୁ କହିଥିଲେ ଏହି ବିଧେୟକ ଦ୍ବାରା ନିର୍ବାଚନ ପ୍ରକ୍ରିୟାରେ ସ୍ବଚ୍ଛତା ଆସିବ। ମତଦାତାମାନେ ଏକାଧିକ ସ୍ଥାନରେ ନାମ ପଞ୍ଜୀକରଣ ପୂର୍ବକ ମତଦାନ କରୁଥିବାବେଳେ ଏହାକୁ ରୋକାଯାଇପାରିବ। ନିର୍ବାଚନ ଆୟୋଗ ଦେଶର ନିର୍ବାଚନ ପ୍ରକ୍ରିୟାରେ ସଂସ୍କାର ନିମନ୍ତେ ନେଇଥିବା ପଦକ୍ଷେପ ମଧ୍ୟରେ ଏହା ଅନ୍ୟତମ। ତେବେ ବିରୋଧୀ ଦଳଗୁଡିକ ନିଜ ଦାବିକୁ ନେଇ ଗୃହରେ ହୋହଲ୍ଲା କରିବାରୁ ଗୃହକୁ ଦିନକ ପାଇଁ ମୁଲତବୀ ରଖାଯାଇଥିଲା।
Comments are closed.