ଚେନ୍ନାଇ: ଚେନ୍ନାଇ ସୁପରକିଙ୍ଗ୍ସ ଅଧିନାୟକ ମହେନ୍ଦ୍ର ସିଂହ ଧୋନୀ ଏବଂ ତାଙ୍କ ପତ୍ନୀ ସାକ୍ଷୀ ବିମାନକୁ ଅପେକ୍ଷା କରି ତଳେ ଶୋଇପଡ଼ିଥିଲେ। ଚେନ୍ନାଇର ଏକ ବିମାନବନ୍ଦରରେ ବୁଧବାର ଏହା ଦେଖିବାକୁ ମିଳିଥିଲା। ଏହାର ଫଟୋ ଧୋନୀ ନିଜେ ଇନ୍ଷ୍ଟ୍ରାଗ୍ରାମରେ ଅପଲୋଡ କରିଛନ୍ତି।
ଧୋନୀଙ୍କ ଟିମ୍ ଆପିଇଏଲରେ ବର୍ତ୍ତମାନ ସୁଦ୍ଧା ଉତ୍ତମ ପ୍ରଦର୍ଶନ କରିଆସିଛି। ୬ଟି ମ୍ୟାଚ ଖେଳି ଚେନ୍ନାଇ ୫ଟିରେ ବିଜୟ ହାସଲ କରି ଆଇପିଏଲ ପଏଣ୍ଟ ତାଲିକାରେ ଶୀର୍ଷରେ ରହିଛି। ଗତ ମଙ୍ଗଳବାର ଦଳ ଏମ.ଏ. ଚିଦମ୍ବରମ ଷ୍ଟାଡିୟମରେ କୋଲକାତା ନାଇଟ ରାଇଡର୍ସକୁ ୭ ଉଇକେଟରେ ହରାଇଛି। ଏହା ପରେ ଧୋନୀ ବାହିନୀ ଆଗାମୀ ଗୁରୁବାର ଜୟପୁରଠାରେ ରାଜସ୍ଥାନ ରୟାଲ୍ସକୁ ଭେଟିବ। ବ୍ୟସ୍ତ କାର୍ଯ୍ୟସୂଚୀ ଭିତରେ ଟିମ୍ ମଙ୍ଗଳବାର ବିଜୟ ହାସଲ ପରେ ବି ସେଲିବ୍ରେଶନ କରିପାରି ନ ଥିଲା। କାରଣ ଧୋନୀଙ୍କ ଟିମ୍କୁ ତୁରନ୍ତ ଜୟପୁର ଯିବାର ଥିଲା। ତେଣୁ ଧୋନୀ ବୁଧବାର ବିମାନବନ୍ଦରରେ ବିମାନକୁ ଅପେକ୍ଷା କରି ତଳେ ଶୋଇଥିଲେ। ଶୋଇବା ସମୟରେ ଧୋନୀ ତାଙ୍କ ପତ୍ନୀ ସାକ୍ଷୀଙ୍କ ସହ ଏକ ଫଟୋ ଉଠାଇ ଇନଷ୍ଟାଗ୍ରାମରେ ଶେୟାର କରିଥିଲେ। ଫଟୋରେ ଧୋନୀ ଏବଂ ସାକ୍ଷୀ ବ୍ୟାଗ ଉପରେ ମୁଣ୍ଡ ରଖି ତଳେ ଶୋଇଥିବା ଦେଖାଯାଇଛି। ଫଟୋ ତଳେ ଧୋନୀ ଲେଖିଛନ୍ତି, ଯଦି ଆପଣଙ୍କ ଫ୍ଲାଇଟ ସକାଳୁ ଜଳଦି ଥିବ ତା’ହେଲେ ଏପରି ହେବ।
