ବେଙ୍ଗାଲୁରୁ : କର୍ଣ୍ଣାଟକର ଏକ ଆଶ୍ଚର୍ଯ୍ୟ କରିବା ଭଳି ଘଟଣା ସାମ୍ନାକୁ ଆସିଛି। ଏଠାରେ ଜଣେ ମହିଳା ନିଜ ସ୍ୱାମୀଙ୍କ ସହ ଯୁକ୍ତି ତର୍କ ହେବା ପରେ ସେ ନିଜର ୬ ବର୍ଷର ଶିଶୁ ପୁତ୍ରକୁ ନାଳକୁ ଫିଙ୍ଗି ଦେବା ଘଟଣା ହଇଚଇ ସୃଷ୍ଟି କରିଛି। ଏହି ଘଟଣା ପରେ ଶିଶୁକୁ ଖୋଜାଖୋଜି କରିବା ପାଇଁ ଉଦ୍ଧାରକାରୀ ଦଳ କାର୍ଯ୍ୟ ଆରମ୍ଭ କରିଥିଲେ। ମାତ୍ର ଶିଶୁର ମୃତଦେହକୁ କୁମ୍ଭୀର ମୁହଁରୁ ଉଦ୍ଧାର କରିଥିଲେ। ଶିଶୁ ଶରୀରର କିଛି ଅଂଶକୁ କୁମ୍ଭୀର ଖାଇ ଦେଇଛି। ପୁଲିସ ହତ୍ୟା ମାମଲା ରୁଜୁ କରିବା ସହ ମହିଳା ଓ ତାଙ୍କ ସ୍ୱାମୀକୁ ଗିରଫ କରି ତଦନ୍ତ ଜାରି ରଖିଛି।
ପୁଲିସ ଠାରୁ ମିଳିଥିବା ସୂଚନାନୁଯାୟୀ, ଏହି ଘଟଣା ଉତ୍ତର କନ୍ନଡ ଜିଲାର ନିକଟରେ ହଲାମଦୀ ଗାଁର। ଜଣେ ୩୨ ବର୍ଷୀୟ ମହିଳା ସାବିତ୍ରୀଙ୍କର ନିଜ ସ୍ୱାମୀ ରବି(୩୬)ଙ୍କୁ ଏହି ମାମଲାରେ ଗିରଫ କରାଯାଇଛି। ତାଙ୍କ ୬ ବର୍ଷର ପୁଅ ବିନୋଦକୁ କଥା କହିବା ଓ ଶୁଣିବାରେ କିଛି ସମସ୍ୟା ଥିଲା। ଏହି କଥାକୁ ନେଇ ଦମ୍ପତିଙ୍କ ମଧ୍ୟରେ ଅନେକ ସମୟରେ ବିବାଦ ହେଉଥିଲା। ଶନିବାର ଉଭୟଙ୍କ ମଧ୍ୟରେ କଳହ ହୋଇଥିଲା। ଏହାପରେ ରାତି ପ୍ରାୟ ୯ଟାରେ ନିଜ ପୁଅ ବିନୋଦକୁ ନାଳକୁ ଫିଙ୍ଗି ଦେଇଥିଲେ। ଏହି ନାଳ କୁମ୍ଭୀର ଭର୍ତ୍ତି କାଳି ନଦୀ ସହ ମିଶିଛି। ଘଟଣାର କିଛି ସମୟ ପରେ ପୁଲିସ ଓ ଉଦ୍ଧାରକାରୀ ଦଳ ନାଳରେ ଖୋଜାଖୋଜି ଆରମ୍ଭ କରି ଦେଇଥିଲେ। ଅନେକ ସମୟ ଖୋଜାଖୋଜି କରିବା ପରେ ରାତିରେ ଉଦ୍ଧାର କରିବା ସମ୍ଭବ ହୋଇନଥିଲା।
ପରଦିନ ରବିବାର ଉଦ୍ଧାରକାରୀ ଦଳ ପୁନଃ ଖୋଜାଖୋଜି କରିଥିଲେ। ଏହାପରେ ଶିଶୁର ମୃତଦେହକୁ କୁମ୍ଭୀର ପାଟିରୁ ଉଦ୍ଧାର କରିଥିଲେ। ଶିଶୁଟିର ଡାହାଣ ହାତକୁ କୁମ୍ଭୀର ଖାଇଦେବା ସହ ଶରୀରର ଅନେକ ଅଂଶରେ ଗଭୀର ଆଘାତ ଓ କାମୁଡା ଚିହ୍ନ ଦେଖାଯାଇଛି। ଏହି ଘଟଣା ପାଇଁ ମହିଳା ଜଣକ ନିଜ ସ୍ୱାମୀଙ୍କୁ ଦୋଷାରୋପ କରିଛନ୍ତି। ପୁଲିସ ଘଟଣାର ତଦନ୍ତ ଜାରି ରଖିଛି।
Comments are closed.