ଧାମନଗର: ଉପନିର୍ବାଚନ ପାଇଁ କମ୍ପୁଛି ଧାମନଗର । ନିଜ ପ୍ରାର୍ଥୀଙ୍କୁ ଜିତାଇବାକୁ ପ୍ରଚାର କରୁଛନ୍ତି ଦଳୀୟ ନେତା । ଆଜି ଧାମନଗର ପାଇଁ ମୈଦାନକୁ ଓହ୍ଲାଇବେ ବିଜେଡି ସୁପ୍ରିମୋ ନବୀନ ପଟ୍ଟନାୟକ । ଉପନିର୍ବାଚନ ପାଇଁ ଭର୍ଚ୍ଚୁଆଲ ଜରିଆରେ ଆଜି ମୁଖ୍ୟମନ୍ତ୍ରୀ ପ୍ରଚାର କରିବେ । ବିଜେଡି ପ୍ରାର୍ଥୀ ଅବନ୍ତି ଦାସଙ୍କ ପାଇଁ ନବୀନ ଭୋଟ୍ ମାଗିବେ । ଏଥିପାଇଁ ଧାମନଗର ନିର୍ବାଚନ ମଣ୍ଡଳିର ୧୩ଟି ସ୍ଥାନରେ ବ୍ୟାପକ ବ୍ୟବସ୍ଥା କରାଯାଇଛି । ସେପଟେ ଧାମନଗର ବିଧାନସଭା ଆସନ ହାତକୁ ନେବାକୁ କସରତ କରୁଛନ୍ତି ବିଜେପି, କଂଗ୍ରେସ ଓ ସ୍ୱାଧୀନ ପ୍ରାର୍ଥୀ ।
ଧାମନଗରରେ ନେତା ଓ ମନ୍ତ୍ରୀଙ୍କ ଭିଡ ଲାଗୁଥିବା ଦେଖିବାକୁ ମିଳୁଛି । ପ୍ରଚାର କରିବାକୁ ହାତରେ ଆଉ ଗୋଟିଏ ଦିନ ରହିଛି । ଅର୍ଥାତ୍ ଆସନ୍ତାକାଲି ପ୍ରଚାରର ଶେଷ ଦିନ । ତେଣୁ ଆଜି ବି ଭୋଟରଙ୍କୁ ମନାଇବାକୁ ମୈଦାନକୁ ଷ୍ଟାର ପ୍ରଚାରକ ମାନେ ଓହ୍ଲାଇବେ । ଆଜି ମୁଖ୍ୟମନ୍ତ୍ରୀଙ୍କ ପ୍ରଚାର ଥିବାରୁ ବିଜେଡି ମହଲରେ ବେଶ ଉତ୍ସାହ ଦେଖିବାକୁ ମିଳିଛି । ଧାମନଗରରେ ଏଥିପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଥିବା ବେଳେ ନେତା କର୍ମୀ ମାନେ ଆଜି ମଧ୍ୟ ଘର ଘର ବୁଲି ପ୍ରଚାର କରିବେ । ସେପଟେ ବିଜେପି ମଧ୍ୟ ତାର ନିର୍ବାଚନ ମଣ୍ଡଳିକୁ ହାତରୁ କିପରି ଖସାଇବ ନାହିଁ ସେଥିପାଇଁ ଚେଷ୍ଟା ଜାରି ରଖିଛି ।
ବାରମ୍ବାର ଧାମନଗରକୁ କେନ୍ଦ୍ରମନ୍ତ୍ରୀ ମାନେ ଗସ୍ତ କରିବା ସହ ଘନଘନ ପ୍ରଚାର କରୁଛନ୍ତି । ବିଜେପି ପ୍ରାର୍ଥୀ ସୂର୍ଯ୍ୟବଂଶୀ ସୁରଜକୁ ଜିତାଇବାକୁ ଦଳୀୟ ନେତାମାନେ ଏକଜୁଟ ହୋଇଥିବା ଦେଖିବାକୁ ମିଳିଛି । ଖାଲି ସେତିକି ନୁହେଁ କଂଗ୍ରେସ ମଧ୍ୟ ତାର ପ୍ରାର୍ଥୀ ପାଇଁ ଜୋରଦାର ପ୍ରଚାର କରୁଛି । ଦଳର ଅନକେ ବିଧାୟକଙ୍କ ସହ ପିସିସି ସଭାପତି ମଧ୍ୟ ପ୍ରଚାର ମୈଦାନକୁ ଓହ୍ଲାଇଛନ୍ତି । ସ୍ୱାଧୀନ ପ୍ରାର୍ଥୀ ମଧ୍ୟ ନିଜର ସମର୍ଥକଙ୍କୁ ଧରି ଧାମନଗରର ଭୋଟର ଭାଇ ଭଉଣୀ ମାନଙ୍କୁ ନିଜ ଆଡ଼କୁ ଆକୃଷ୍ଟ କରିବାକୁ ଚେଷ୍ଟା କରୁଛନ୍ତି ।
Comments are closed.