କଟକ: ବର୍ଷା-ଅନୁଭବଙ୍କ ବିବାଦ ନେଇ ରୁଜୁ ମାମଲାର ଶୁଣାଣିକରି ଉଭୟ ପରସ୍ପର ପ୍ରତି କୌଣସି ଆକ୍ଷେପ ନ କରିବାକୁ ହାଇକୋର୍ଟ ପୁଣି ନିର୍ଦେଶ ଦେଇଛନ୍ତି। ଗତ ମେ ୨୭ ତାରିଖରେ ଏନେଇ ହାଇକୋର୍ଟ ନିର୍ଦେଶ ଦେଇଥିଲେ; ମାତ୍ର ପରବର୍ତ୍ତୀ ସମୟରେ ଉଭୟ ପରସ୍ପର ପ୍ରତି ସାମାଜିକ ଗଣମାଧ୍ୟମରେ ପରୋକ୍ଷ ଭାବରେ ଆକ୍ଷେପ କରିଥିଲେ ବୋଲି ଅଭିଯୋଗ ରହିଛି। ଶୁକ୍ରବାର ଏନେଇ ବିଚାରପତି କେ. ଆର. ମହାପାତ୍ରଙ୍କ ଖଣ୍ଡପୀଠ ପୁଣି ଏହି ଆଦେଶ ଦେଇଛନ୍ତି। ହାଇକୋର୍ଟ ଏନେଇ ପୂର୍ବରୁ ଯେଉଁ ଅନ୍ତରୀଣ ନିର୍ଦେଶନାମା ଜାରି କରିଥିଲେ ତାହା ବଳବତ୍ତର ରଖିବା ପାଇଁ ଅଦାଲତ କହିଛନ୍ତି। ଡିସେମ୍ବର ୨ ତାରିଖରେ ମାମଲାର ପରବର୍ତ୍ତୀ ଶୁଣାଣି ହେବ। ସାମାଜିକ ଗଣମାଧ୍ୟମରେ ବର୍ଷା ପ୍ରିୟଦର୍ଶିନୀଙ୍କ ବିରୋଧରେ ହେଉଥିବା ସମ୍ମାନହାନି ଓ ଚରିତ୍ରସଂହାର ଭଳି ଘଟଣାରେ ଅଙ୍କୁଶ ଲଗାଇବାକୁ ପ୍ରାର୍ଥନା କରି ବର୍ଷା ଏହି ଆବେଦନ କରିଥିଲେ। ଏହି ମାମଲାରେ କେନ୍ଦ୍ର ସରକାର, ସୂଚନା ଓ ପ୍ରସାରଣ ମନ୍ତ୍ରଣାଳୟ, ରେଜିଷ୍ଟ୍ରର ଅଫ ନିଉଜ ପେପରସ ଅଫ ଇଣ୍ଡିଆ ଓ ଅନୁଭବ ମହାନ୍ତିଙ୍କୁ ପକ୍ଷଭୁକ୍ତ କରାଯାଇଛି। ସୋସିଆଲ ମେଡିଆରେ ଅନୁଭବ ମହାନ୍ତିଙ୍କର ଏକାଧିକ ଭିଡିଓ ଭାଇରାଲ ହୋଇଥିବା ବେଳେ ଏହା ବର୍ଷାଙ୍କର ନାରୀତ୍ବକୁ ଅପମାନିତ ଓ ତାଙ୍କର ଚରିତ୍ର ସଂହାର କରିଥିବା ସେ ନେଇ ସେ ପୁରୀଘାଟ ଓ କଟକ ସାଇବର ଥାନାରେ ଏତଲା ସହ ଅଦାଲତ ଯାଇଥିଲେ।
Comments are closed.