କଟକ: ଚଳିତ ବର୍ଷ ଧବଳେଶ୍ୱର ଯାତ୍ରା ବନ୍ଦ ହେବା ନେଇ ଏସପି ସିଦ୍ଧାର୍ଥ କାଟାରିଆ ପ୍ରତିକ୍ରିୟା ରଖିଛନ୍ତି । ଧବଳେଶ୍ୱରରେ ୧୪୪ ଧାରା ଜାରି ହୋଇଥିବାରୁ ଧବଳେଶ୍ୱର ଯାତ୍ରା ବନ୍ଦ ହେବା ନେଇ ଏସପି କହିଛନ୍ତି । ତାହାଛଡ଼ା ଏଥର ଧବଳେଶ୍ୱରକୁ ଯିବାକୁ କୌଣସି ଭକ୍ତଙ୍କୁ ଅନୁମତି ଦିଆଯିବନାହିଁ ବୋଲି ଏସପି କହିଥିବା ବେଳେ ଝୁଲାପୋଲ ଅସୁରକ୍ଷିତ ଥିବାରୁ ଏପରି କଟକଣା ଲଗାଯାଇଛି ବୋଲି କୁହାଯାଇଛି ।
ଅସୁରକ୍ଷିତ ପୋଲ ପାଇଁ ପ୍ରଶାସନ ୧୪୪ ଧାରା ଜାରି କରିଛି । ଆମ ପାଇଁ ଯାତ୍ରୀଙ୍କ ସୁରକ୍ଷା ସବୁଠାରୁ ଗୁରୁତ୍ୱପୂର୍ଣ୍ଣ ବୋଲି ଏସପି ସିଦ୍ଧାର୍ଥ କାଟାରିଆ ତାଙ୍କ ପ୍ରତିକ୍ରିୟାରେ କହିଛନ୍ତି । ବର୍ତ୍ତମାନ କାର୍ତ୍ତିକ ମାସ ଚାଲୁଥିବାରୁ ଧବଳେଶ୍ୱରଙ୍କ ନିକଟରେ ଭିଡ ଜମୁଥିଲା । କିଛିଦିନ ପରେ ବଡଓଷା ଓ ପଞ୍ଚୁକ ଆସୁଥିବାରୁ ଭିଡ଼କୁ ଦୃଷ୍ଟିରେ ରଖି ପ୍ରଶାସନ ଏପରି ପଦକ୍ଷେପ ଗ୍ରହଣ କରିଛି । ଗୁଜରାଟରେ ଝୁଲାପୋଲ ଛିଡ଼ିବା ପରେ ପ୍ରଶାସନ ପକ୍ଷରୁ ଏହିପରି ତତ୍ପରତା ଦେଖିବାକୁ ମିଳିଛି।
