କଟକ: ଅବକାରୀ ସ୍କ୍ୱାଡକୁ ବଡ଼ ଧରଣର ସଫଳତା ମିଳିଛି । ଗଞ୍ଜେଇ ଚୋରା ଚାଲାଣ ହେଉଥିବା ସନ୍ଦେହ କରି ଗାଡ଼ି ଯାଞ୍ଚ କରୁଥିବା ବେଳେ ଏକ କୁଇଣ୍ଟାଲରୁ ଅଧିକ ରୁପା ଇଟା ଜବତ କରିଛି । ସୂଚନା ମୁତାବକ କଟକ ଟାଙ୍ଗି ଟୋଲଗେଟ୍ ନିକଟରେ ଅବକାରୀ ସ୍କ୍ୱାଡ ଦ୍ୱାରା ଯାଞ୍ଚ କରାଯାଉଥିଲା । ସେହି ସମୟରେ ଏକ କାର୍ ଯାଞ୍ଚ କରିବା ବେଳେ କୁଇଣ୍ଟାଲରୁ ଊର୍ଦ୍ଧ୍ଵ ରୁପା ଇଟା ସହ ଚାନ୍ଦି ଅଳଙ୍କାର ଜବତ କରିଥିଲା ଅବକାରୀ ସ୍କ୍ୱାଡ୍ ।
ଖାଲି ସେତିକି ନୁହେଁ ଗାଡ଼ିରୁ ନଗଦ ୧୪ ଲକ୍ଷ ଟଙ୍କା ଜବତ କରାଯାଇଥିବା ମଧ୍ୟ ସୂଚନା ଦେଇଛି ଅବକାରୀ ବିଭାଗ । ବିଭାଗର କହିବା ଅନୁଯାୟୀ ପଶ୍ଚିମବଙ୍ଗ ନମ୍ବର ଥିବା ଏକ କାରରେ ଏହାକୁ ଚାଲାଣ କରାଯାଉଥିଲା । ଆସିକାରୁ ଏହାକୁ ଖଡଗପୁର ଚାଲାଣ ହେଉଥିଲା । ଏହା ଅବକାରୀ ସ୍କ୍ୱାଡ ଜାଣିବାକୁ ପାଇଛି । ଘଟଣାରେ ୨ଜଣ ଚାଲାଣକାରୀଙ୍କୁ ଅଟକ ରଖାଯାଇଛି ।
