ଚୌଦ୍ୱାର: ଇମ୍ଫା ଶିଳ୍ପଗୋଷ୍ଠିର ୬୨ତମ ପ୍ରତିଷ୍ଠା ଦିବସ ତଥା ଇମ୍ଫାର ପ୍ରତିଷ୍ଠାତା ସ୍ବର୍ଗତ ଡ. ବଂଶୀଧର ପଣ୍ଡାଙ୍କ ଜନ୍ମ ଦିବସ କମ୍ପାନୀ କ୍ଲବ ହାଉସ ପରିସରରେ ପାଳିତ ହୋଇଯାଇଛି। ବରିଷ୍ଠ ପ୍ରଶାସନିକ ଅଧିକାରୀ ଜି.ସାରଦା ପ୍ରସାଦ ରାଓଙ୍କ ପରିଚାଳନାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଇମ୍ଫାର ସର୍ବକାଳୀନ ନିର୍ଦ୍ଦେଶକ ଚିତ୍ତ ରଞ୍ଜନ ରାଏ ମୁଖ୍ୟ ଅତିଥି ଭାବେ ଯୋଗଦେଇ କମ୍ପାନୀ ପ୍ରତିଷ୍ଠା ଓ ବିକାଶରେ ଚୌଦ୍ୱାରବାସୀଙ୍କ ସହଯୋଗ ଓ ଶ୍ରମିକ ମାନଙ୍କ କର୍ତବ୍ୟନିଷ୍ଠା ଇମ୍ଫାକୁ ବିଶ୍ୱ ଦରବାରରେ ପରିଚିତ କରାଇ ପାରିଛି ବୋଲି ମତବ୍ୟକ୍ତ କରିଥିଲେ ।
ଉପ-ସଭାପତି ବିନୟ କୁମାର ଅଗ୍ରୱାଲ ବିବରଣୀ ପ୍ରଦାନ କରି ଶିଳ୍ପ କର୍ମକ୍ଷେତ୍ରକୁ ଦୁର୍ଘଟଣାମୁକ୍ତ ରଖିବା ଏବଂ ପରିବେଶକୁ ପ୍ରଦୂଷଣମୁକ୍ତ ରଖିବା ଦିଗରେ କାର୍ଯ୍ୟ କରିବାପାଇଁ ଇମ୍ଫା ସଂକଳ୍ପବଦ୍ଧ ବୋଲି ପ୍ରକାଶ କରିଥିଲେ । ଏହି ଅବସରରେ ବିଭିନ୍ନ ବିଦ୍ୟାଳୟଦ୍ୱାରା ଆୟୋଜିତ ବିଜ୍ଞାନମେଳାରେ ପ୍ରତିଯୋଗୀ ମାନଙ୍କୁୁ ଅତିଥି ମାନେ ପୁରସ୍କାର ପ୍ରଦାନ କରିଥିଲେ।
ଦୀର୍ଘବର୍ଷ ଧରି କାର୍ଯ୍ୟରତ କର୍ମଚାରୀ ମାନଙ୍କୁ କମ୍ପାନୀ ତରଫରୁ ସମ୍ଭର୍ଦ୍ଧିତ କରାଯିବା ସହିତ ଚଳିତବର୍ଷ ମାଟ୍ରିକ୍ ପରୀକ୍ଷାରେ ସର୍ବୋଚ୍ଚ ନମ୍ବର ରଖିଥିବା ଛାତ୍ରଛାତ୍ରୀ ମାନଙ୍କୁ ମଧ୍ୟ ସମ୍ବର୍ଦ୍ଧିତ କରାଯାଇଥିଲା । ସହକାରୀ ପରିଚାଳକ ବିକ୍ରମାଦିତ୍ୟ ନାୟକ ସଭାରେ ସଂଯୋଜନା କରିଥିଲେ ଏବଂ ଉପ ସାଧାରଣ ପ୍ରଶାସକ ଧୃବଚରଣ ରାଉତ ଓ କର୍ମଚାରୀ କାର୍ଯ୍ୟକ୍ରମ ପରିଚାଳନା କରିଥିଲେ। ଏହି ଅବସରରେ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।
Comments are closed.