ନୂଆଦିଲ୍ଲୀ : ଚନ୍ଦ୍ରୟାନ-୨ର ଲ୍ୟାଣ୍ଡର ‘ବିକ୍ରମ’ ଚନ୍ଦ୍ରପୃଷ୍ଠରେ ହାର୍ଡ ଲ୍ୟାଣ୍ଡିଂ କରିଛି ବୋଲି ଆମେରିକୀୟ ମହାକାଶ ଗବେଷଣା କେନ୍ଦ୍ର (ନାସା) ଶୁକ୍ରବାର ସ୍ପଷ୍ଟ କରିଛି। ଲ୍ୟାଣ୍ଡିଂ ପରେ ଏହା କେଉଁ ସ୍ଥାନରେ ରହିଛି ତାହା ସ୍ପଷ୍ଟ ହୋଇପାରି ନାହିଁ।
ସଂସ୍ଥାର ଉଚ୍ଚ ଶକ୍ତିଶାଳୀ କ୍ୟାମେରା ରେକୋନାଇସାନ୍ସ ଅର୍ବିଟର କ୍ୟାମେରା କ୍ବିକମ୍ୟାପ (ଆରଓସି) ହାର୍ଡ ଲ୍ୟାଣ୍ଡିଂ ସ୍ଥଳର ଫଟୋଚିତ୍ର ଉତ୍ତୋଳନ କରିଛି, ଯେଉଁଥିରେ ୧୫୦ କିଲୋମିଟର ଅଞ୍ଚଳର ଫଟୋ ସନ୍ନିହିତ। ଲ୍ୟାଣ୍ଡିଂସ୍ଥଳଟି ଦକ୍ଷିଣ ମେରୁଠାରୁ ୬୦୦ କିଲୋମିଟର ଦୂରରେ ଅବସ୍ଥିତ ବୋଲି ନାସା ପକ୍ଷରୁ କୁହାଯାଇଛି। ସନ୍ଧ୍ୟା ସମୟରେ ଫଟୋଟି ଉତ୍ତୋଳନ କରାଯାଇଥିବାରୁ ଉକ୍ତ ସ୍ଥାନର ଅଧିକାଂଶ କ୍ଷେତ୍ରରେ ଛାଇ ପଡିଥିଲା। ବିକ୍ରମ େକୗଣସି ଛାଇ ଆଢୁଆଳରେ ରହିଯାଇଥାଇପରେ ବୋଲି ଉକ୍ତ ରିପୋର୍ଟରେ ଦର୍ଶାଯାଇଛି। ଅକ୍ଟୋବର ୧୪ ସୁଦ୍ଧା ଏଲଆରଓ ଉକ୍ତ ସ୍ଥାନ ଦେଇ ପୁନଃ ଅତିକ୍ରମ କରିବ। ଏହି ସମୟରେ ଯଦି ସେଠାରେ ଆଲୋକ ପଡେ ତା’ହେଲେ ବିକ୍ରମକୁ ଚିହ୍ନଟ କରି ତାହାର ଫଟୋ ଉତ୍ତୋଳନ କରିବା ସମ୍ଭବ ହେବ ବୋଲି ଏଲଆରଓ ମିଶନର ଉପପ୍ରକଳ୍ପ ବୈଜ୍ଞାନିକ ଜନ କେଲର କହିଛନ୍ତି। ସେପ୍ଟେମ୍ବର ୭ରେ ଚନ୍ଦ୍ରପୃଷ୍ଠରେ ସଫ୍ଟ ଲ୍ୟାଣ୍ଡିଂ କରିବା ପୂର୍ବରୁ ବିକ୍ରମର ଯୋଗାଯୋଗ ଭାରତୀୟ ମହାକାଶ ଗବେଷଣା କେନ୍ଦ୍ର (ଇସ୍ରୋ)ଠାରୁ ବିଚ୍ଛିନ୍ନ ହୋଇଯାଇଥିଲା। ଏହାର ଦିନକ ପରେ ଚନ୍ଦ୍ରୟାନ-୨ର ଅର୍ବିଟର ବିକ୍ରମର ଫଟୋ ଉତ୍ତୋଳନ କରିବାରେ ସଫଳ ହୋଇଥିଲା। ନିର୍ଦ୍ଧାରିତ ଲ୍ୟାଣ୍ଡିଂ ସ୍ଥାନ ନିକଟରେ ଏହା ଓଲଟି ରହିଥିବା ସେଥିରୁ ଜଣାପଡିଥିଲା। ବିକ୍ରମର କାର୍ଯ୍ୟକାଳ ୧୪ ଦିନ ଥିବା ବେଳେ ତାହା ସହିତ ଯୋଗାଯୋଗ ସମ୍ଭବ ହୋଇ ନ ଥିଲା। ପରେ ଚନ୍ଦ୍ରପୃଷ୍ଠରେ ରାତି ଆରମ୍ଭ ହୋଇଯାଇଥିଲା। ଚନ୍ଦ୍ରର ଗୋଟିଏ ଦିନ ପୃଥିବୀର ୧୪ ଦିନ ସହିତ ସମାନ।
