ପଶ୍ଚିମବଙ୍ଗ ଡାଇମଣ୍ଡ ହାରବରଠାରେ ବିଜେପି ଅଧ୍ୟକ୍ଷ ଜେପି ନଡ୍ଡାଙ୍କ ରାଲି ଉପରେ ଆକ୍ରମଣ ପରେ କେନ୍ଦ୍ର ସରକାର ରାଜ୍ୟପାଳ ଜଗଦୀପ ଧଂଖାରଙ୍କ ଠାରୁ ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତି ସମ୍ପର୍କରେ ଏକ ରିପୋର୍ଟ ମାଗିଛନ୍ତି। କେନ୍ଦ୍ର ଗୃହ ସଚିବ ପଶ୍ଚିମବଙ୍ଗର ମୁଖ୍ୟ ଶାସନ ସଚିବଙ୍କୁ ବିଜେପି ମୁଖ୍ୟ ଜଗତ ପ୍ରକାଶ ନଡ୍ଡାଙ୍କ ଉପରେ ହୋଇଥିବା ଆକ୍ରମଣ ନେଇ ଚିଠି ଲେଖିଛନ୍ତି। ଗୃହ ସଚିବ ତାଙ୍କ ଚିଠିରେ ନଡ୍ଡାଙ୍କୁ ପର୍ଯ୍ୟାପ୍ତ ସୁରକ୍ଷା ଯୋଗାଇବା ପାଇଁ କହିଛନ୍ତି। ତାଙ୍କର ୧୨୦ ଦିନିଆ ଦେଶ ଗସ୍ତର ଏକ ଅଂଶ ଭାବରେ ନଡ୍ଡା ବୁଧବାର ଠାରୁ ଦୁଇ ଦିନିଆ ପଶ୍ଚିମବଙ୍ଗ ଗସ୍ତରେ ପହଂଚିବା ପରେ ସେଠାରେ ବିଭିନ୍ନ କାର୍ଯ୍ୟକ୍ରମରେ ଅଂଶଗ୍ରହଣ କରୁଛନ୍ତି ଏବଂ ଆସନ୍ତା ବର୍ଷ ପଶ୍ଚିମବଙ୍ଗ ବିଧାନସଭା ନିର୍ବାଚନ ଥିବାରୁ ବୁଥ ସ୍ତରରେ ମଧ୍ୟ ଦଳକୁ ମଜବୁତ କରିବା ଉଦ୍ଦେଶ୍ୟରେ ଯାଉଛନ୍ତି।
ଆଜି ବିକ୍ଷୋଭକାରୀମାନେ ନଡ୍ଡାଙ୍କ ରାଲି ଉପରେ ଆକ୍ରମଣ ସହ ଗାଡି ଉପରକୁ ପଥର ଫିଙ୍ଗିଥିଲେ ଯେଉଁଥିରେ ଅନେକ ବିଜେପି ନେତା ଆହତ ହୋଇଥିବା ଅଭିଯୋଗ ହୋଇଛି। କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଏହି ଆକ୍ରମଣକୁ ନିନ୍ଦା କରିଛନ୍ତି। ଶାହା କହିଛନ୍ତି ଯେ କେନ୍ଦ୍ର ସରକାର ଏହି ଆକ୍ରମଣକୁ ଅତ୍ୟନ୍ତ ଗମ୍ଭୀରତାର ସହ ଗ୍ରହଣ କରିଛନ୍ତି। ଏହି ପ୍ରାୟୋଜିତ ହିଂସା ପାଇଁ ବଙ୍ଗଳା ସରକାରଙ୍କୁ ରାଜ୍ୟର ଶାନ୍ତିପ୍ରିୟ ଲୋକଙ୍କୁ ଉତ୍ତର ଦେବାକୁ ପଡିବ ବୋଲି ଶାହା ଟ୍ୱିଟ୍ କରି କହିଛନ୍ତି।
