ମୃତ୍ତିକା ଓ ଜଳ: ଜୀବନର ଏକ ଉତ୍ସ

ଭୁବନେଶ୍ବର: ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ ପକ୍ଷରୁ ଆଇସିଏଆର୍-ଇଣ୍ଡିଆନ୍ ଇନଷ୍ଟିଚ୍ୟୁଟ ଅଫ୍ ସଏଲ୍ ଆଣ୍ଡ ୱାଟର କଞ୍ଜରଭେସନ୍ (ଆଞ୍ଚଳିକ କେନ୍ଦ୍ର- ସୁନାବେଡା)ର ମିଳିତ ଆନୁକୂଲ୍ୟରେ ସୁନାବେଡ଼ାସ୍ଥିତ କ୍ୟାମ୍ପସରେ  ବିଶ୍ୱ ମୃତ୍ତିକା ଦିବସ ପାଳିତ ହୋଇଯାଇଛି। ଚଳିତ ବର୍ଷ ବିଶ୍ୱ ମୃତ୍ତିକା ଦିବସ ପାଳନର ବିଷୟବସ୍ତୁ ହେଉଛି “ମୃତ୍ତିକା ଓ ଜଳ: ଜୀବନର ଏକ ଉତ୍ସ”।  କୁଳପତି ପ୍ରଫେସର ଚକ୍ରଧର ତ୍ରିପାଠୀ ମୁଖ୍ୟ ଅତିଥି ଭାବେ ଯୋଗଦେଇ ଦୀପ ଜାଳି କାର୍ୟ୍ୟକ୍ରମକୁ ଉଦ୍ ଘାଟନ କରିଥିଲେ। ପ୍ରଫେସର ତ୍ରିପାଠୀ ତାଙ୍କ ଅଭିଭାଷଣରେ ମାଟିର ମହତ୍ତ୍ୱ ଏବଂ ଆମ ଭାରତୀୟ ପୁରାଣ ଓ ଶାସ୍ତ୍ରୀୟ ସାହିତ୍ୟରେ ମାଟି ବିଷୟରେ ବର୍ଣ୍ଣନା କରିବା ସହ ମାଟି ସଂରକ୍ଷଣ ପାଇଁ ସମସ୍ତେ ସଂକଳ୍ପ ନେବା ଉପରେ ଗୁରୁତ୍ୱାରୋପ କରିଥିଲେ ।

ସମ୍ମାନିତ ଅତିଥି ଭାବେ ନାଲ୍ କୋ, ଦାମନଯୋଡ଼ି, କୋରାପୁଟର ଏଜିଏମ୍ ଡ. ପି.କେ.ପଟ୍ଟାଯୋଶୀ ଯୋଗଦେଇ ଆମ ଜୀବନରେ ମୃତ୍ତିକା ଓ ଜଳର ମହତ୍ତ୍ୱ ସମ୍ପର୍କରେ ବର୍ଣ୍ଣନା କରିଥିଲେ। ଆଇସିଏଆର-ଆଇଆଇଏସ୍ଡବ୍ଲ୍ୟୁସିର ପ୍ରମୁଖ ବୈଜ୍ଞାନିକ ଡ. ପି. ରାଜା, ବୈଜ୍ଞାନିକ ଡ. ଏସ୍ କେ ସାମଲ ଏବଂ ଓଡ଼ିଶା କେନ୍ଦ୍ରୀୟ ବିଶ୍ବବିଦ୍ୟାଳୟର ଜୈବ ବିବିଧତା ଓ ପ୍ରାକୃତିକ ସମ୍ପଦ ସଂରକ୍ଷଣ ବିଭାଗର ବରିଷ୍ଠ ସହକାରୀ ପ୍ରଫେସର ଦେବବ୍ରତ ପଣ୍ଡା ଚଳିତ ବର୍ଷର ବିଶ୍ୱ ମୃତ୍ତିକା ଦିବସର ବିଷୟବସ୍ତୁ ଉପରେ ଆଲୋକପାତ କରିବା ସହ ମାଟିର ଗୁରୁତ୍ୱର ବୈଜ୍ଞାନିକ ଦିଗ ବିଷୟରେ ମଧ୍ୟ ବର୍ଣ୍ଣନା କରିଥିଲେ । ଏହି କାର୍ୟ୍ୟକ୍ରମରେ ଆଇସିଏଆର-ଆଇଆଇଏସ୍ଡବ୍ଲ୍ୟୁସି ର ମୁଖ୍ୟ ଡ. ଡି. ଏବଂ ସୁନାବେଡ଼ାସ୍ଥିତ ଏରୋନୋଟିକ୍ସ ଡିଏଭି ସ୍କୁଲର ପ୍ରିନ୍ସିପାଲ ଡ. ପି.କେ. ମିଶ୍ର ଉପସ୍ଥିତ ଥିଲେ ।

କାର୍ୟ୍ୟକ୍ରମକୁ ସଂଯୋଜନା କରି କୃଷି ବିଭାଗ ସଂଯୋଜକ ଡ. ଜୟନ୍ତ କୁମାର ନାୟକ ସ୍ୱାଗତ ଭାଷଣ ଦେଇଥିଲେ। ଏହି କାର୍ୟ୍ୟକ୍ରମରେ ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟର କୃଷି ବିଭାଗ, ପଶୁପାଳନ ଓ ଦୁଗ୍ଧ ବିଭାଗ, ଜଙ୍ଗଲ ପରିଚାଳନା ବିଭାଗର ଅଧ୍ୟାପକ ଓ ଛାତ୍ରଛାତ୍ରୀ ଏବଂ ସୁନାବେଡ଼ାସ୍ଥିତ ଏରୋନୋଟିକ୍ସ ଡିଏଭି ସ୍କୁଲର ଅଧ୍ୟାପକ ଓ ଛାତ୍ରଛାତ୍ରୀ ମାନେ ଉପସ୍ଥିତ ଥିଲେ ।

ଏହି କାର୍ୟ୍ୟକ୍ରମରେ ସମସ୍ତେ ମୃତ୍ତିକା ସଂରକ୍ଷଣ ଏବଂ ଜଳ ସଂରକ୍ଷଣ ସମ୍ପର୍କରେ ଭିନ୍ନ ଭିନ୍ନ ଉପାୟ ପ୍ରଦର୍ଶନ କରିଥିଲେ । ମାଟିର ମହତ୍ତ୍ୱ ଏବଂ ମାଟିକୁ କିପରି ସଂରକ୍ଷଣ କରାଯାଇପାରିବ ସେ ସମ୍ପର୍କରେ ଏକ ପ୍ରଦର୍ଶନୀ ମଧ୍ୟ କରାଯାଇଥିଲା । ଛାତ୍ରଛାତ୍ରୀମାନେ ବିଶେଷଜ୍ଞଙ୍କ ସହ ଆଲୋଚନା କରି ସେମାନଙ୍କ ସନ୍ଦେହ ଦୂର କରିଥିଲେ ବୋଲି ବିଶ୍ଵବିଦ୍ୟାଳୟର ଜନସମ୍ପର୍କ ଅଧିକାରୀ ଡ. ଫଗୁନାଥ ଭୋଇ ଜଣାଇଛନ୍ତି । ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟର କୃଷି ବିଭାଗର ଅତିଥି ଅଧ୍ୟାପକ ଡ. ଝୁମିଶ୍ରୀ ମେହେର ଧନ୍ୟବାଦ ଅର୍ପଣ କରିଥିଲେ। ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟର କୃଷି ବିଭାଗର ଅତିଥି ଅଧ୍ୟାପକ ଡ. ଦେବଦତ୍ତ ପଣ୍ଡା ଏହି କାର୍ୟ୍ୟକ୍ରମକୁ ସଂଯୋଜନା କରିଥିଲେ।