ନୂଆଦିଲ୍ଲୀ: ଦେଶର ବୃହତ୍ତମ ଫାର୍ମାସ୍ୟୁଟିକାଲ୍ କମ୍ପାନୀ କ୍ୟାଡିଲା ହେଲଥ କେୟାର ଅଧ୍ୟକ୍ଷ ପଙ୍କଜ ପଟେଲ କରୋନା ସଂକ୍ରମଣ ପ୍ରତିଷେଧକ ଔଷଧ ପ୍ରସ୍ତୁତ କରିଥିବା ଦାବି କରିଛନ୍ତି। ସେ କହିଛନ୍ତି ଯେ ବର୍ତ୍ତମାନ ପଶୁମାନଙ୍କ ଉପରେ ଏହାର ପରୀକ୍ଷା କରାଯାଉଛି। ଆସନ୍ତା ତିନି ମାସ ମଧ୍ୟରେ ଏହା ଲୋକଙ୍କ ପାଇଁ ଉପଲବ୍ଧ ହେବ ବୋଲି ସେ କହିଛନ୍ତି। ସେ ନିଶ୍ଚିତ ଭାବରେ ଏଥିରେ ସଫଳତା ପାଇବେ ବୋଲି ସେ ଆଶା ବ୍ୟକ୍ତ କରିଛନ୍ତି।
କ୍ୟାଡିଲା ଗ୍ରୁପ୍ ମ୍ୟାଲେରିଆ ପାଇଁ ବହୁଳ ପରିମାଣରେ ଔଷଧ ପ୍ରସ୍ତୁତ କରିଥାଏ। ଚୀନରେ ପ୍ରଥମେ କରୋନା ମହାମାରୀ ବ୍ୟାପିବା ପରେ କ୍ୟାଡିଲା ଗ୍ରୁପ୍ ଏହା ଉପରେ ଅନୁସନ୍ଧାନ ଓ ଗବେଷଣା ଆରମ୍ଭ କରିଥିଲା। ଏବିପି ନ୍ୟୁଜ୍ ପକ୍ଷରୁ ଦିଆଯାଇଥିବା ସୂଚନା ଅନୁଯାୟୀ କ୍ୟାଡିଲା ହେଲଥ କେୟାର ଅଧ୍ୟକ୍ଷ ପଙ୍କଜ ପଟେଲ କହିଛନ୍ତି ଯେ ବୈଜ୍ଞାନିକମାନେ ଏହି କରୋନା ପ୍ରତିଷେଧକ ଟିକା ପ୍ରସ୍ତୁତ କରିଛନ୍ତି।
ପଙ୍କଜ କହିଛନ୍ତି, କରୋନା ପ୍ରତିଷେଧକ ଉପରେ ଚାଲିଥିବା ଗବେଷଣାରେ ଆମେ ପ୍ରାରମ୍ଭିକ ପର୍ଯ୍ୟାୟରେ ଟୀକା ପ୍ରସ୍ତୁତ କରିଛୁ। ଆମେ ବର୍ତ୍ତମାନ ଏହାକୁ ପଶୁମାନଙ୍କ କ୍ଷେତ୍ରରେ ପରୀକ୍ଷଣ କରାଯାଉଛି। ଆସନ୍ତା ମାସ ସୁଦ୍ଧା ପଶୁ ଉପରେ ହେଉଥିବା ପରୀକ୍ଷଣର ଫଳାଫଳ ମିଳିବା ପରେ ଏହାକୁ ମନୁଷ୍ୟଙ୍କ ଉପରେ ପ୍ରୟୋଗ କରାଯିବ। ଆସନ୍ତା ୩ ମାସ ମଧ୍ୟରେ ଏହା ଲଞ୍ଚ ହେବ ବୋଲି ସେ କହିଛନ୍ତି। ଯଦି କ୍ୟାଡିଲା ଗ୍ରୁପର ଦାବି ସତ୍ୟ ପ୍ରମାଣିତ ହୁଏ, ତେବେ ଏହା ଏକ ବଡ଼ ସଫଳତା ହେବ।
