ବଲାଙ୍ଗିର: ବଲାଙ୍ଗିର ବନାଞ୍ଚଳ ପକ୍ଷରୁ ୨ଟି ସ୍ଥାନରେ ଚଢଉ କରାଯାଇଛି । ବିପୁଳ ପରିମାଣର ଶାଳ, ଶାଗୁଆନ କାଠ ସହ ପିକଅପ୍ ଜବତ ହୋଇଛି । ଜଣଙ୍କୁ ଅଟକ ରଖି ବନ ଅଧିକାରୀ ପଚରାଉଚରା ଚଳାଇଛନ୍ତି । ବଲାଙ୍ଗିର ବନାଞ୍ଚଳ କର୍ମଚାରୀମାନେ ମଙ୍ଗଳବାର ରାତିରେ ମହିମୁଣ୍ଡା ନିକଟରେ ପାଟ୍ରୋଲିଂ କରୁଥିଲେ । ବୁଧୁବାର ଭୋର ୫ଟାରେ ବଲାଙ୍ଗିର ଅଭିମୁଖେ ଓଆର୍ ୧୫ଆର୍ ୭୭୦୮ ନମ୍ବର ବିଶିଷ୍ଟ ଏକ ପିକଅପ୍ ଭ୍ୟାନ୍ ଆସୁଥିଲା । ବନ କର୍ମଚାରୀଙ୍କୁ ଦେଖି ଗାଡ଼ି ଚାଳକ ଗାଡ଼ି ଛାଡ଼ି ଫେରାର୍ ହୋଇ ଯାଇଥିଲେ । ବନ କର୍ମଚାରୀମାନେ ପିକଅପ୍ ଭ୍ୟାନରେ ବିପୁଳ ପରିମାଣର ଶାଳ କାଠ ବୋଝେଇ ହୋଇଥିବା ଦେଖିବାକୁ ପାଇଥିଲେ ।
ଉକ୍ତ ଗାଡ଼ିକୁ ଜବତ କରି ବନାଞ୍ଚଳ କାର୍ଯ୍ୟାଳୟକୁ ଅଣା ଯାଇଥିଲା । ୯୧ ଖଣ୍ଡ ସାଇଜ୍ ଶାଳ କାଠ ଜବତ କରାଯାଇଥିଲା । ଏହାର ଆନୁମାନିକ ବଜାର ମୂଲ୍ୟ ପ୍ରାୟ ୧ଲକ୍ଷ ଟଙ୍କାରୁ ଅଧିକ ହେବ ବୋଲି ବଲାଙ୍ଗିର ବନାଞ୍ଚଳ ଅଧିକାରୀ କେଶବ କିଶୋର ନାୟକ କହିଛନ୍ତି । କାଠ ବଲାଙ୍ଗିର ସହର ଅଭିମୁଖେ ଅଣାଯାଉଥିବା ଅନୁମାନ କରାଯାଉଛି । ବନ ବିଭାଗ ପକ୍ଷରୁ ଏକ ମାମଲା ରୁଜୁ କରି ଜବତ ଗାଡ଼ିର ମାଲିକ ସମ୍ପର୍କରେ ଛାନଭିନ୍ ଆରମ୍ଭ ହୋଇଛି । ସେହିପରି ବୁଧୁବାର ଅପରାହ୍ନରେ ସଦର ଥାନା ଅନ୍ତର୍ଗତ ଖୁଣ୍ଟପାଲି ଗାଁର ଲମ୍ବୋଦର ପଧାନଙ୍କ ଘରେ ବନ ବିଭାଗ ଚଢଉ କରିଥିଲା । ଚଢଉରେ ପ୍ରାୟ ୫୦ ସେପ୍ଟି ଶାଗୁଆନ ପଟା ଓ ସାଇଜ୍ ଶାଳ କାଠ ଜବତ ହୋଇଛି ।
ଜବତ କାଠର ଆନୁମାନିକ ମୂଲ୍ୟ ୧ଲକ୍ଷରୁ ଊର୍ଦ୍ଧ୍ଵ ଟଙ୍କା ହେବ । କିଛି ଶାଗୁଆ କାଠ ଗଣ୍ଡି ମଧ୍ୟ ଲମ୍ବୋଦରଙ୍କ ଘର ନିକଟରେ ପଡିଛି । ତାହାକୁ ଗୁରୁବାର ଜବତ କରାଯିବ ବୋଲି ସୂଚନା ମିଳିଛି । ଲମ୍ବୋଦରଙ୍କୁ ବନ ବିଭାଗ ଅଟକ ରଖି ପଚରାଉଚରା କରୁଛି । ବନଖଣ୍ଡ ଅଧିକାରୀଙ୍କ ନିର୍ଦ୍ଦେଶ ଓ ବନାଞ୍ଚଳ ଅଧିକାରୀଙ୍କ ତତ୍ତ୍ୱାବଧାନରେ ୨ ଚଢଉରେ ଫରେଷ୍ଟର ବ୍ୟାସଦେବ ସାହୁ, ଭବାନୀ ସ୍ୱାଇଁ, ଜେନା ରାଉତ, ରାଜେଶ୍ୱରୀ ମହାକୁଡ, ଫରେଷ୍ଟ ଗାର୍ଡ ଅଶୋକ ସେଠ୍, ରଞ୍ଜିତ କୁମ୍ଭାର, ଆଦିତ୍ୟ ମାଝି ଓ ପାରା ସ୍କ୍ୱାର୍ଡ୍ କର୍ମଚାରୀମାନେ ସାମିଲ ଥିଲେ ।
