ଗୋପାଳପୁର: ଗୋପାଳପୁର ଅଞ୍ଚଳର ଜଣେ ବିଜେପି ନେତା ବି. କୁର୍ମାଙ୍କୁ ସଂଘବଦ୍ଧ ଭାବେ ମରଣାନ୍ତକ ଆକ୍ରମଣ କରାଯିବା ପରେ ଅପହରଣ କରାଯାଇଛି। ଏହା ପରେ ତାଙ୍କଠାରୁ ମୂଲ୍ୟବାନ ସାମଗ୍ରୀ ଲୁଟ୍ କରାଯାଇଛି। ଏ ନେଇ ଗୋପାଳପୁର ଥାନାରେ ଲିଖିତ ଅଭିଯୋଗ ହୋଇଛି। ତେବେ ଅପହରଣ ପରେ ପୁଣି ଆକ୍ରମଣ ସମୟରେ ପୁଲିସ ପହଞ୍ଚି ଯିବାରୁ କୁର୍ମାଙ୍କ ଜୀବନ ରକ୍ଷା ପାଇଯାଇଛି। ପୁଲିସକୁ ଦେଖି ଆକ୍ରମଣକାରୀମାନେ ଛତ୍ରଭଙ୍ଗ ଦେଇଥିଲେ।
ଅଭିଯୋଗ ଅନୁଯାୟୀ, ମାଣ୍ଡିଆପଲ୍ଲୀ ଜଗନ୍ନାଥ ବିହାରରେ ରହୁଥିବା ବିଜେପି ନେତା ତଥା ବି. କୁର୍ମା ସୋମବାର ରାତି ପ୍ରାୟ ୧୧ ଟାବେଳେ ଜଗନ୍ନାଥପୁର ପେଟ୍ରୋଲ ପମ୍ପ ସମ୍ମୁଖରେ ଠିଆ ହୋଇଥିଲେ। ଏହି ସମୟରେ କରାପଲ୍ଲୀର ୬ ଜଣ ଯୁବକ ହଠାତ ତାଙ୍କ ନିକଟରେ ପହଞ୍ଚି ଖଣ୍ଡା, କାତି ଓ ଠେଙ୍ଗାରେ ଅତର୍କିତ ଆକ୍ରମଣ କରିଥିଲେ। ଏହା ସହ ଆହତ ଅବସ୍ଥାରେ କୁର୍ମାଙ୍କୁ ଘଟଣା ସ୍ଥଳରୁ ପ୍ରାୟ ୬ କିମି ଦୂର କରାପଲ୍ଲୀର ଏକ ନିର୍ଜନ ଅନ୍ଧାରୁଆ ସ୍ଥାନକୁ ନେଇ ସେଠାରେ ପୁଣି ଆକ୍ରମଣ କରିଥିଲେ। ତାଙ୍କଠାରୁ ୪୦ ହଜାର ଟଙ୍କା ଲୁଟ୍ କରିଥିଲେ। ଠିକ୍ ସମୟରେ ଗୋପାଳପୁର ପୁଲିସ ଘଟଣାସ୍ଥଳରେ ପହଞ୍ଚି ଯିବାରୁ ଆକ୍ରମଣକାରୀମାନେ ସେଠାରୁ ଫେରାର ହୋଇଯାଇଥିଲେ ବୋଲି କୁର୍ମା ଅଭିଯୋଗ ପତ୍ରରେ ଉଲ୍ଲେଖ କରିଛନ୍ତି। ଆକ୍ରମଣରେ କୁର୍ମାଙ୍କ ଶରୀରରେ ବିଭିନ୍ନ ସ୍ଥାନରେ ଆଘାତ ଲାଗିଛି। ଘଟଣା ନେଇ ଗୋପାଳପୁର ବିଜେପିରେ ତୀବ୍ର ଉତ୍ତେଜନା ଦେଖା ଦେବା ସହ ତୁରନ୍ତ ଆକ୍ରମଣକାରୀମାନଙ୍କୁ ଗିରଫ କରିବାକୁ ଦାବି ଜଣାଯାଇଛି। ଅନ୍ୟପଟେ କୁର୍ମାଙ୍କୁ ଯେଉଁ ସ୍ଥାନରେ ମାଡ ମାରିବା ସହ ଅପହରଣ କରାଯାଇଥିଲା , ତାହା ଚମାଖଣ୍ଡି ଥାନା ଅଧୀନରେ ଆସୁଥିବାରୁ ଗୋପାଳପୁର ପୁଲିସ ମାମଲା ରୁଜୁ କରି ନ ଥିବା ଜଣାପଡିଛି।
