ନେମାଳ : ନେମାଳ ଥାନା ଅନ୍ତର୍ଗତ ବନ୍ଧକାଟିଆ ଗ୍ରାମପଞ୍ଚାୟତ ବିଜୁ ଯୁବ ବାହିନୀ ପକ୍ଷରୁ ପରିବେଶ ସୁରକ୍ଷା ଓ ପ୍ଲାଷ୍ଟିକ ହଟାଅ ଓଡିଶା ବଞ୍ଚାଅ ସଚେତନତା ବୈଠକ ଓ ଶୋଭାଯାତ୍ରା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ବିଜୁ ଯୁବ ବାହିନୀର ସଭାପତି ସୁଶାନ୍ତ କୁମାର ମାହାଳିଙ୍କ ଅଧ୍ୟକ୍ଷତାରେ ଆୟୋଜିତ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ପଞ୍ଚାୟତ ବିଜେଡି ସଭାପତି ରବିନ୍ଦ୍ରନାଥ ତ୍ରିପାଠୀ ଆନୁଷ୍ଠାନିକ ଭାବେ ଉକ୍ତ କାର୍ଯ୍ୟକ୍ରମକୁ ଉଦ୍ଘାଟିତ କରି କହିଲେ ଯେ ପୃଥିବୀ ଭଳି ଏକ ଅନନ୍ୟ ସୁନ୍ଦର ସବୁଜ ଗ୍ରହରେ ମଣିଷ ଈଶ୍ୱରଙ୍କ ଶ୍ରେଷ୍ଠତମ ସୃଷ୍ଟି। ସବୁ ପ୍ରାଣୀମାନଙ୍କଠାରୁ ମନୁଷ୍ୟ ପରିବେଶର ବିସ୍ତାର ଓ ବ୍ୟାପକତା ନିଶ୍ଚୟ ନିଆରା। ଜନ ଜୀବନ ତଥା କାର୍ଯ୍ୟକଳାପୁ ପ୍ରଭାବିତ କରୁଥିବା ମାଟି, ପାଣି, ପବନରେ ପରିପୁଷ୍ଟ ପରିବେଶର ଅବକ୍ଷୟ ଓ ତଜ୍ଜନୀତ ବିଭିନ୍ନ ସମସ୍ୟା ଏକାନ୍ତ ଉଦବେଗର କାରଣ ହୋଇପଡିଛି। ମଣିଷର ପରିବେଶ ଉଭୟ ଆଙ୍ଗିକ ଓ ଆତ୍ମିକ ଭାବେ ପ୍ରାକୃତିକ ଓ ଅପ୍ରାକୃତିକ କାରକମାନଙ୍କ ଏକ ଅଦ୍ଭୁତ ପୂର୍ବ ସମନ୍ୱୟ। ପରିବେଶ ସନ୍ତୁଳନ ଆଜିର ମୁଖ୍ୟ ଆବଶ୍ୟକତାକୁ ସବୁଜ ପୃଥିବୀରେ ପରିଣତ କରିବା ନିମତ୍ତ ସଚେତନତା ଭଳି ମହନୀୟ କାର୍ଯ୍ୟ ଏକାନ୍ତ ଆବଶ୍ୟକ ବୋଲି ସୂଚନା ଦେଇଥିଲେ। ଉକ୍ତ କାର୍ଯ୍ୟକ୍ରମକୁ ବିଜୁ ଯୁବ ବାହିନୀର ସମ୍ପାଦକ ମଧୁସ୍ମିତା ମଲଙ୍କ ସମେତ ସମସ୍ତ ସଦସ୍ୟ ମାନେ ଅଂଶଗ୍ରହଣ କରି ପରିଚାଳନା କରିଥିଲେ। ଏହି କାର୍ଯ୍ୟକ୍ରମକୁ ଉକ୍ତ ଅଞ୍ଚଳର ଜନସାଧାରଣ ଓ ବୁଦ୍ଧିଜିବି ମାନେ ପ୍ରଶଂସା କରିଥିଲେ। ଶେଷରେ କିଶୋର ତ୍ରିପାଠୀ ଧନ୍ୟବାଦ ଅର୍ପଣ କରିଥିଲେ।
