ନୂଆଦିଲ୍ଲୀ: ସର୍ବଭାରତୀୟ ଫୁଟବଲ ମହାସଂଘ(ଏଆଇଏଫଏଫ)ର ସଭାପତି କଲ୍ୟାଣ ଚୌବେଙ୍କ ଇସ୍ତଫା ଦାବି କରିଛନ୍ତି ପୂର୍ବତନ ଅଧିନାୟକ ବାଇଚୁଙ୍ଗ ଭୁତିଆ। ଏଆଇଏଫଏଫ ପ୍ରଶାସନରେ ଯେଉଁ ଅବ୍ୟବସ୍ଥା ଦେଖା ଦେଇଛି ସେଥିପାଇଁ କଲ୍ୟାଣଙ୍କୁ ଦାୟୀ କରିବା ସହ ତାଙ୍କ ଇସ୍ତଫା ଦାବି କରିଛନ୍ତି ବାଇଚୁଙ୍ଗ।
ସୂଚନାଥାଉକି, ଗତବର୍ଷ ନଭେମ୍ବର ୭ରେ ଏଆଇଏଫଏଫର ମହାସଚିବ ପଦରୁ ସାଜି ପ୍ରଭାକରନଙ୍କୁ ବହିଷ୍କୃତ କରାଯାଇଥିଲା। ତେବେ ଏହା ଉପରେ ଡିସେମ୍ବର ୮ରେ ଦିଲ୍ଲୀ ଉଚ୍ଚ ନ୍ୟାୟାଳୟ ଅନ୍ତରୀଣ ରହିତାଦେଶ ଜାରି କରିଥିଲେ। ସମଗ୍ର ଘଟଣାକ୍ରମ ସମ୍ପର୍କରେ ଆଲୋଚନା ପାଇଁ ଏଆଇଏଫଏଫର କାର୍ଯ୍ୟନିର୍ବାହୀ କମିଟି ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ଯୋଗ ଦେଇ ବାଇଚୁଙ୍ଗ କହିଥିଲେ ଏଆଇଏଫଏଫ ପ୍ରଶାସନରେ ଯେଉଁ ଅବ୍ୟବସ୍ଥା ଦେଖା ଦେଇଛି ସେଥିନିମନ୍ତେ କେବଳ ସାଜି ପ୍ରଭାକରନଙ୍କୁ ଦାୟୀ କରାଯାଇ ପାରିବ ନାହିଁ। ପ୍ରଭାକରନଙ୍କ ସହ ଏଆଇଏଫଏଫ ସଭାପତି କଲ୍ୟାଣ ଚୌବେ ଓ କୋଷାଧ୍ୟକ୍ଷ କିପା ଅଜୟ ମଧ୍ୟ ସମାନ ଭାବେ ଦାୟୀ। ଏହି ୩ଜଣ କାର୍ଯ୍ୟନିର୍ବାହୀ କମିଟିର ବିନା ସ୍ବୀକୃତିରେ ଏକାଧିକ ନିଷ୍ପତ୍ତି ନେଇଥିଲେ। ତେଣୁ କଲ୍ୟାଣ ଚୌବେ ଓ କିପା ଅଜୟ ନିଜ ପଦରୁ ଇସ୍ତଫା ଦେବା ଉଚିତ। ଭାରତୀୟ ଫୁଟବଲରେ ରାଜନୀତି ବୃଦ୍ଧି ପାଇଥିବା ବାଇଚୁଙ୍ଗ କହିଥିଲେ। ଏହା ଫୁଟବଲର ଭବିଷ୍ୟତ ପାଇଁ କ୍ଷତିକାରକ ବୋଲି ସେ ଆଶଙ୍କାବ୍ୟକ୍ତ କରିଥିଲେ।
