ନୂଆଦିଲ୍ଲୀ: ଭାରତୀୟ ମହିଳା ଫୁଟବଲର ଆକ୍ରମଣପନ୍ଥୀ ଖେଳାଳି ବାଲା ଦେବୀ ଓ ଯୁବ ଖେଳାଳି ମନୀଷା କଲ୍ୟାଣଙ୍କୁ ୨୦୨୦-୨୧ ନିମନ୍ତେ ସର୍ବଭାରତୀୟ ଫୁଟବଲ ମହାସଂଘ (ଏଆଇଏଫଏଫ) ପୁରସ୍କାର ମିିଳିଛି।
ବାଲା ଦେବୀଙ୍କୁ ବର୍ଷର ଶ୍ରେଷ୍ଠ ମହିଳା ପୁରସ୍କାର ମିଳିଥିବା ବେଳେ ମନୀଷାଙ୍କୁ ବର୍ଷର ଶ୍ରେଷ୍ଠ ଉଦୀୟମାନ ଖେଳାଳି ପୁରସ୍କାର ମିଳିଛି।
ସୂଚନାଥାଉକି ବାଲା ଦେବୀ ପୂର୍ବରୁ ୨୦୧୪ ଓ ୨୦୧୫ରେ ଏଆଇଏଫଏଫ ଶ୍ରେଷ୍ଠ ମହିଳା ଫୁଟବଲର୍ ପୁରସ୍କାର ହାସଲ କରି ସାରିଛନ୍ତି। ବାଲା ଦେବୀ ବର୍ତ୍ତମାନ ସ୍କଟଲାଣ୍ଡରେ ସ୍ଥାନୀୟ ଦଳ ରେଞ୍ଜର୍ସ ଏଫ୍ସି ତରଫରୁ ଖେଳୁଛନ୍ତି। ଗତବର୍ଷ ଫେବୃଆରୀରେ ସେ ରେଞ୍ଜର୍ସ ଏଫ୍ସି ଦଳରେ ଯୋଗ ଦେଇଥିଲେ। ୟୁରୋପର କୌଣସି କ୍ଲବରେ ସାମିଲ ହେବା ପ୍ରସଙ୍ଗରେ ସେ ହେଉଛନ୍ତି ପ୍ରଥମ ଭାରତୀୟ ମହିଳା ଫୁଟବଲର୍। ୨୦୨୦-୨୧ ବର୍ଷ ନିମନ୍ତେ ଏଆଇଏଫଏଫ ଶ୍ରେଷ୍ଠ ମହିଳା ଫୁଟବଲର୍ ପୁରସ୍କାର ମିଳିବା ପରେ ନିଜ ପ୍ରତିକ୍ରିୟାରେ ବାଲା ଦେବୀ ଖୁସିବ୍ୟକ୍ତ କରିବା ସହ ପରିବାର, ସାଥୀ ଖେଳାଳି ଓ ପ୍ରଶିକ୍ଷକଙ୍କ ସହଯୋଗ ଯୋଗୁଁ ଏହି ସଫଳତା ପାଇଥିବା କହିଛନ୍ତି।
ଅନ୍ୟପକ୍ଷରେ ୧୯ ବର୍ଷୀୟା ମନୀଷା ଆକ୍ରମଣପନ୍ଥୀ ଖେଳାଳି ହୋଇଥିବା ବେଳେ ପ୍ରଥମଥର ପାଇଁ ଏଆଇଏଫଏଫ ଉଦୀୟମାନ ଖେଳାଳି ପୁରସ୍କାର ହାସଲ କରିଛନ୍ତି। ୨୦୧୯ରେ ହଂକଂ ବିପକ୍ଷରେ ସେ ଭାରତୀୟ ମହିଳା ସିନିୟର ଦଳ ତରଫରୁ ପ୍ରଥମ ମ୍ୟାଚ୍ ଖେଳିଥିଲେ। ୨୦୧୯-୨୦ରେ ମନୀଷା ଭାରତୀୟ ମହିଳା ଲିଗ୍ରେ ଗୋକୁଲମ୍ କେରଳ ଏଫ୍ସି ତରଫରୁ ଖେଳି ଏହି ଦଳକୁ ଚମ୍ପିଆନ୍ କରାଇବାରେ ପ୍ରମୁଖ ଭୂମିକା ଗ୍ରହଣ କରିଥିଲେ। ସେଥିପାଇଁ ତାଙ୍କୁ ଟୁର୍ଣ୍ଣାମେଣ୍ଟର ଶ୍ରେଷ୍ଠ ଉଦୀୟମାନ ଖେଳାଳି ପୁରସ୍କାର ମିଳିଥିଲା।
Comments are closed.