ଆଠଗଡ: ଆଠଗଡ ବ୍ଲକ ଅନ୍ତର୍ଗତ କନ୍ଦରପୁର ପଞ୍ଚାୟତ ଅଗ୍ରଣୀ ସ୍ୱେଚ୍ଛାସେବୀ ସଂଗଠନ ଫ୍ରେଣ୍ଡସ୍କ୍ଲବ ପକ୍ଷରୁ ସ୍ୱାମୀ ବିବେକାନନ୍ଦଙ୍କ ଜୟନ୍ତୀ ଦିବସ ଠାରୁ ସପ୍ତାହ ବ୍ୟାପୀ ସମାଜସେବା ଦିବସ ପାଳନ କରାଯାଉଛି। ଭାରତ ସରକାରଙ୍କ କ୍ରୀଡା ଓ ଯୁବସେବା ମନ୍ତ୍ରଣାଳୟର ନେହେରୁ ଯୁବକେନ୍ଦ୍ର ସଂଗଠନ ସହାୟତାରେ ଆୟୋଜିତ ଏହି କାର୍ଯ୍ୟକ୍ରମରେ କ୍ଲବର ସଦସ୍ୟଙ୍କ ସହିତ ସ୍ଥାନୀୟ ଯୁବକମାନେ ଭାଗନେଇ ବିଭିନ୍ନ ସେବାମୂଳକ କାର୍ଯ୍ୟ କରିଥିଲେ। ଜାନୁଆରୀ ୧୨ ରୁ ୧୯ତାରିଖ ପର୍ଯ୍ୟନ୍ତ ୭ଦିନ ଧରି ଆୟୋଜିତ ହେଉଥିବା ଏହି କାର୍ଯ୍ୟକ୍ରମ ଅବସରରେ ୧୫ତାରିଖରେ ସାମାଜିକ ସେବା ଦିବସ ଭାବେ ସାରା ଭାରତବର୍ଷରେ ପାଳନ ହେଉଥିବାରୁ ଫ୍ରେଣ୍ଡସ୍ କ୍ଲବ ପକ୍ଷରୁ କରୋନା କଟକଣା ଅନୁପାଳନ ପୂର୍ବକ ଗ୍ରାମ୍ୟରାସ୍ତା, ମନ୍ଦିର ପରିସର ଓ ସ୍କୁଲ ପରିସରକୁ ସଫେଇ କରାଯାଇଥିଲା। ଏଥିସହିତ ଏକ ସଚେତନତା ସଭା କ୍ଲବର ସଭାପତି ଇଂ ପ୍ରିୟବ୍ରତ ଦାସଙ୍କ ସଂଯୋଜନାରେ ଅନୁଷ୍ଠିତ ହୋଇଥିଲା।
କ୍ଲବର ସଭାପତି ଓ ଅନ୍ୟମାନେ ସ୍ୱାମୀ ବିବେକାନନ୍ଦଙ୍କ ଫଟୋଚିତ୍ରରେ ମାଲ୍ୟାର୍ପଣ କରିବା ପରେ ଯୋଗାଭ୍ୟାସରେ ସୂର୍ଯ୍ୟନମସ୍କାର କରିଥିଲେ। ବିଶ୍ୱରେ ବସୁଧୈବ କୁଟୁମ୍ବକମ୍ର ବାର୍ତ୍ତା ଦେଇ ଭାରତର ସ୍ୱତନ୍ତ୍ର ପରିଚୟ ସୃଷ୍ଟି କରିଥିବା ସ୍ୱାମୀ ବିବେକାନନ୍ଦଙ୍କର ଜୀବନୀ, ଆଦର୍ଶ ଓ ବାଣୀକୁ ପାଥେୟ କରି ସମାଜସେବାରେ ଉତ୍ସର୍ଗୀକୃତ ହେବା ପାଇଁ ସଭାପତି ଶ୍ରୀ ଦାସଙ୍କ ସମେତ କ୍ଲବର ସଦସ୍ୟ ଓ ସ୍ଥାନୀୟ ଯୁବକମାନେ ସଂକଳ୍ପ କରିଥିଲେ। ସଂପାଦକ ଭାଷ୍କର ଚନ୍ଦ୍ର ବେହେରା, ସଭ୍ୟ ସୂର୍ଯ୍ୟକାନ୍ତ ସେଠୀ, ସଂଜୀତ ବାରିକ, ପ୍ରଦୀପ ସାହୁ, ମଧୁସାହୁ, ତପନ କୁମାର ସାହୁ, ପ୍ରଦୀପ କୁମାର ସାହୁ, ପ୍ରକାଶ ଦଳାଇ, ଚନ୍ଦନ ନାୟକ, ଚିନ୍ମୟ ସାହୁ ଓ ଗିରିଧାରୀ ବାରିକ ପ୍ରମୁଖ କ୍ଲବ ସଦସ୍ୟ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।
