କୋରଙ୍ଗାରେ ଅବକାରୀ ଚଢାଉ, ୪୮୦ଲିଟର ମଦ ଓ ୩୦୮୦ଲିଟର ପୋଚ ଜବତ

ଆଠଗଡ/ତିଗିରିଆ: କଟକ ଜିଲ୍ଲାପାଳ ଓ ଭାରପ୍ରାପ୍ତ ଜିଲ୍ଲା ଅବକାରୀ ଅଧିକ୍ଷକଙ୍କ ନିର୍ଦ୍ଦେଶକ୍ରମେ ଆଠଗଡ ଅବକାରୀ ଏବଂ ଜିଲ୍ଲା ଭ୍ରାମ୍ୟମାଣ ଅବକାରୀ ଦଳ ପକ୍ଷରୁ ଆଠଗଡ ଥାନା ଅନ୍ତର୍ଗତ କୋରଙ୍ଗା ଗ୍ରାମ ଉପରେ ଚଢାଉ କରାଯାଇ ବିପୁଳ ପରିମାଣର ଦେଶୀମଦ ଓ ଗୁଡପୋଚ ଜବତ କରାଯାଇଛି। କୋରଙ୍ଗା ଅଞ୍ଚଳର ବେଆଇନ ମଦଭାଟି, ବୁଦା ଜଙ୍ଗଲ ଓ ଧାନ ଖେତରେ ଲୁଚାଇ ରଖାଯାଇଥିବା ସଦ୍ୟପ୍ରସ୍ତୁତ ୪୮୦ଲିଟର ଦେଶୀମଦ ଏବଂ ମଦପ୍ରସ୍ତୁତି ପାଇଁ ଶତାଧିକ ପ୍ଲାଷ୍ଟିକ ଜାରକିନରେ ଗଚ୍ଛିତ ଥିବା ୩୦୮୦ଲିଟର ଗୁଡପୋଚ ଜବତ କରାଯାଇ ଘଟଣାସ୍ଥଳରେ ନଷ୍ଟ କରାଯାଇଥିଲା। ପୋଚ ଓ ମଦକୁ ତଳେ ଡାଳିବା ଏବଂ ପ୍ଲାଷ୍ଟିକ ଜାରକିନଗୁଡିକୁ ହାଣି ଫଟାଇବା କାର୍ଯ୍ୟକୁ ଭିଡିଓ ଚିତ୍ରୋତ୍ତଳନ କରାଯାଇଥିବା ଅବକାରୀ ବିଭାଗ ପକ୍ଷରୁ କୁହାଯାଇଛି।

ଏହି ଚଢାଉ ପୂର୍ବରୁ ସେଠାରେ ଉପସ୍ଥିତ ଥିବା ମଦମାଫିଆ ଓ ମଦରନ୍ଧାରେ ନିୟୋଜିତ ଶ୍ରମିକ ଫେରାର ହୋଇଯିବାରୁ କାହାରିକୁ ଗିରଫ କରାଯାଇପାରିନଥିଲା। ଆଠଗଡ ଅବକାରୀ ନିରୀକ୍ଷକ ପ୍ରଭାସ କୁମାର ଚୌଧୁରୀ, ଭ୍ରାମ୍ୟମାଣ ଦଳ ନିରୀକ୍ଷକ ସଂଜୀତ ବାର୍ଲା, ଆଠଗଡ ସହକାରୀ ନିରୀକ୍ଷକ ବିଜୟ କୁମାର ଭଞ୍ଜ ନରସିଂହପୁର ଭାରପ୍ରାପ୍ତ ଅଧିକାରୀ ଦେବାନନ୍ଦ ଭୂୟାଁଙ୍କ ସମେତ ବହୁ ଅବକାରୀ ଅଧିକାରୀ ଓ କର୍ମଚାରୀ ଏହି ଚଢାଉରେ ଅଂଶଗ୍ରହଣ କରିଥିଲେ।

Comments are closed.