ଆଠଗଡ/ତିଗିରିଆ: ଆଠଗଡ ତାଲୁକ ଆଇନସେବା ସମିତି ଆନୁକୁଲ୍ୟରେ ଜାତୀୟ ଆଇନସେବା ଦିବସ ଅବସରରେ ଏକ ଆଇନ ସଚେତନତା ଶିବିର ଅନୁଷ୍ଠିତ ହୋଇଯାଇଛି। ଆଇନସେବା ସମିତିର ଅଧ୍ୟକ୍ଷ ତଥା ଅତିରିକ୍ତ ଜିଲ୍ଲା ଦୌରାଜଜ୍ ପ୍ରଦୀପ୍ତ କୁମାର ସାହୁ ଏହାକୁ ଉଦ୍ଘାଟନ କରିବା ସହ ଏଥିରେ ଅଧ୍ୟକ୍ଷତା କରି ଜାତୀୟ ଆଇନସେବା ଦିବସ ପାଳନ ଓ ଆଇନସେବା ପ୍ରାଧିକରଣ ପ୍ରତିଷ୍ଠାର ଉଦ୍ଦେଶ୍ୟ ଓ ଲକ୍ଷ୍ୟ ସଂପର୍କରେ ଆଲୋକପାତ କରିଥିଲେ।
ଏଥିରେ ସମ୍ମାନିତ ବକ୍ତାଭାବେ ବରିଷ୍ଠ ଦେୱାନୀ ବିଚାରପତି ଶ୍ରୀମୟୀ ଆଚାର୍ଯ୍ୟ, ପ୍ରଥମ ଶ୍ରେଣୀ ବିଚାର ବିଭାଗୀୟ ମାଜିଷ୍ଟ୍ରେଟ୍ ସୌମ୍ୟ ଶଙ୍କର ମହାନ୍ତ, ଆଇନଜୀବୀ ପ୍ରାଣକୃଷ୍ଣ ଦାଶ, ଓକିଲସଂଘର ସଭାପତି ସତ୍ୟେନ ପଣ୍ଡା, ସଂପାଦକ ବନବିହାରୀ ସାହୁ ପ୍ରମୁଖ ଯୋଗଦେଇ କେଉଁମାନେ ଓ କିପରି ମାଗଣା ଆଇନସେବା ପାଇପାରିବେ ସେ ସଂପର୍କରେ କହିବା ସହିତ ବିଭିନ୍ନ ଆଇନ କାନୁନ ସଂପର୍କରେ ଅବତାରଣା କରିଥିଲେ। ଏଥିରେ ଆଠଗଡ ଓକିଲ ସଂଘର ବହୁ ସଭ୍ୟ ଯୋଗଦେଇ ଆଇନର ବିଭିନ୍ନ ଦିଗ ଏବଂ ଆଇନସେବା ସଂପର୍କରେ ନିଜ ନିଜର ବକ୍ତବ୍ୟ ରଖିଥିଲେ। ଆଇନସେବା ସମିତିର ସହାୟିକା ରାଜଶ୍ରୀ ମହଲା ଓ ଅନ୍ୟ କର୍ମଚାରୀମାନେ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।
