ଶ୍ରୀନଗର: କୁପ୍ୱାରା ଜିଲାର କେରାନ୍ ସେକ୍ଟରରେ ସୁରକ୍ଷାକର୍ମୀଙ୍କ ଗୁଳିରେ ୬ ଆତଙ୍କବାଦୀ ନିହତ ହୋଇଛନ୍ତି। ଅସ୍ତ୍ରବିରତି ଚୁକ୍ତିକୁ ବାରମ୍ବାର ଉଲ୍ଲଂଘନ କରି ପାକିସ୍ତାନ ପଟୁ ଗୁଳିଗୋଳା ବର୍ଷଣ ହେବା ପରେ ପାକ୍ ଆତଙ୍କବାଦୀମାନେ ସୀମା ଡେଇଁ ଭାରତ ଭିତରେ ପଶିବାକୁ ଉଦ୍ୟମ ଆରମ୍ଭ କରିଛନ୍ତି। ଆତଙ୍କବାଦୀମାନେ ଯେପରି ସୁରକ୍ଷାକର୍ମୀ ଓ ସେନାଙ୍କ ଦୃଷ୍ଟି ଏଡ଼ାଇ ସହଜରେ ଭାରତରେ ପ୍ରବେଶ କରିପାରିବେ ସେଥିପାଇଁ ପାକିସ୍ତାନ ପଟୁ ସୀମାରେ ଗୁଳିବର୍ଷଣ କରାଯାଉଛି। ଏହି ସୁଯୋଗରେ କିଛି ଆତଙ୍କବାଦୀ ଗତ କାଲି ରାତିରୁ ଜମ୍ମୁକଶ୍ମୀରରେ ପ୍ରବେଶ ଉଦ୍ୟମ କରିଥିଲେ। ଏଲ୍ଓସି ନିକଟରେ ଭାରତର ସୁରକ୍ଷାବାହିନୀ ସେମାନଙ୍କୁ ଅଟକାଇବାକୁ ଚେଷ୍ଟା କରିଥିଲେ। କିନ୍ତୁ ଆତଙ୍କବାଦୀମାନେ ଗୁଳି ଚଳାଇବାରୁ ଭାରତୀୟ ସୁରକ୍ଷା କର୍ମୀ ପାଲଟା ଗୁଳି ଚାଳନା କରିଥିଲେ। ଏଥିରେ ୬ ଜଣ ଆତଙ୍କବାଦୀ ନିହତ ହୋଇଛନ୍ତି। ଅପରେସନ୍ ଜାରି ରହିଥିବାରୁ ମୃତ୍ୟୁ ସଂଖ୍ୟା ବଢ଼ିପାରେ ବୋଲି କୁହାଯାଉଛି।
