ନୂଆଦିଲ୍ଲୀ : ବିଜେପି ନେତୃତ୍ୱାଧୀନ ଏନଡିଏ ସରକାରରେ ଘଟୁଥିବା ଭିଡ ହିଂସାକୁ ନେଇ ନିକଟରେ ୪୯ ଜଣ ପ୍ରତିଷ୍ଠିତ ବ୍ୟକ୍ତି (ସେଲିବ୍ରିଟି) ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଚିଠି ଲେଖିଥିଲେ। ଏହାକୁ ନେଇ ବିଭିନ୍ନ ମହଲରେ ପ୍ରତିକ୍ରିୟା ପ୍ରକାଶ ପାଇଥିଲା। ଏବେ ୬୧ ଜଣ ପ୍ରତିଷ୍ଠିତ ବ୍ୟକ୍ତି (ସେଲିବ୍ରିଟି) ଏହି ଚିଠି ବିରୋଧରେ ଏକ ଖୋଲା ପତ୍ର ଲେଖିଛନ୍ତି।
ଖୋଲାପତ୍ର ପତ୍ରକୁ ଲେଖିଥିବା ସେଲିବ୍ରିଟିଙ୍କ ମଧ୍ୟରେ ବଲିଉଡ଼ ଅଭିନେତ୍ରୀ କଙ୍ଗନା ରାଣାୱତ, ଗୀତିକାର ପ୍ରସୁନ ଯୋଶୀ, ଶାସ୍ତ୍ରୀୟ ନୃତ୍ୟଶିଳ୍ପୀ ତଥା ସାଂସଦ ସୋନଲ ମାନସିଂହ, ବାଦକ ପଣ୍ଡିତ ବିଶ୍ୱ ମୋହନ ଭଟ୍ଟ, ଚଳଚ୍ଚିତ୍ର ନିର୍ମାତା ମଧୁର ଭଣ୍ଡାରକର ଏବଂ ବିବେକ ଅଗ୍ନିହୋତ୍ରୀ ପ୍ରମୁଖ ଅଛନ୍ତି। ଖୋଲା ପତ୍ରରେ ପ୍ରଧାନମନ୍ତ୍ରୀଙ୍କୁ ପତ୍ର ଲେଖିଥିବା ୪୯ ସେଲିବ୍ରିଟିଙ୍କୁ ସମାଲୋଚନା କରାଯାଇଛି। ଏହି ପତ୍ରରେ ୪୯ ସେଲିବ୍ରିଟଙ୍କୁ ‘ସ୍ୱୟମ୍ଭୁ ଅଭିଭାବକ ବା ରକ୍ଷକ’ ବୋଲି ସମ୍ବୋଧନ କରାଯାଇଛି। ୪୯ ସେଲିବ୍ରିଟିଙ୍କ ପତ୍ର ଲେଖିବା ଉଦ୍ଦେଶ୍ୟ ଉପରେ ପ୍ରଶ୍ନ କରାଯିବା ସହ ଏହାକୁ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ବୋଲି କୁହାଯାଇଛି। ଏଥିରେ ପ୍ରଶ୍ନ କରାଯାଇଛି ଯେ ଆଦିବାସୀ ଏବଂ ସାଧାରଣ ଲୋକଙ୍କୁ ମାଓବାଦୀମାନେ ହତ୍ୟା କରୁଥିବାବେଳେ ଏହି ସେଲିବ୍ରିଟମାନେ କାହିଁକି ଚୁପ ରହୁଛନ୍ତି। କାଶ୍ମୀରରେ ବିଚ୍ଛିନ୍ନତାବାଦୀମାନେ ସ୍କୁଲ ବନ୍ଦ କରିବା ସମୟରେ ଏହି ଲୋକମାନେ କେଉଁଠି ଥିଲେ ବୋଲି ପ୍ରଶ୍ନ କରାଯାଇଛି। ପ୍ରଧାନମନ୍ତ୍ରୀଙ୍କୁ ପତ୍ର ଲେଖିଥିବା ୪୯ ସେଲିବ୍ରିଟଙ୍କୁ ଖୋଲା ପତ୍ରରେ କଡ଼ା ସମାଲୋଚନା କରାଯାଇଛି। ୪୯ ସେଲିବ୍ରିଟଙ୍କ ପତ୍ରରେ ଅପମାନଜନକ ଏବଂ ମିଥ୍ୟା ଅଭିଯୋଗ ଲଗାଯାଇଛି ବୋଲି ଖୋଲା ପତ୍ରରେ କୁହାଯାଇଛି।
