ଭୋପାଳ : କର୍ଣ୍ଣାଟକରେ କଂଗ୍ରେସ-ଜେଡିଏସ ସରକାର ଭାଙ୍ଗିବା ପରେ ଚର୍ଚ୍ଚା ହେଉଛି ଯେ ମଧ୍ୟପ୍ରଦେଶରେ ବିଜେପି ଏପରି କିଛି ଓଲଟପାଲଟ କରିପାରେ। ମାତ୍ର ଏହା ମଧ୍ୟରେ ବୁଧବାର ଯେଉଁ ଖବର ସାମ୍ନାକୁ ଆସିଛି, ତାହା ସମ୍ପୂର୍ଣ୍ଣ ରୂପେ ଏହାର ବିପରୀତ ଏବଂ ବିଜେପି ପାଇଁ ଚିନ୍ତାର କାରଣ ସାଜିଛି। ମଧ୍ୟପ୍ରଦେଶ ବିଧାନସଭାରେ ବୁଧବାର ଅପରାଧ ଆଇନ (ସଂଶୋଧନ) ବିଲ ଉପରେ ଭୋଟିଂରେ ବିଜେପିର ୨ ଜଣ ବିଧାୟକ କମଳନାଥ ସରକାରଙ୍କ ସପକ୍ଷରେ ଭୋଟ ଦେଇଛନ୍ତି।
ମୁଖ୍ୟମନ୍ତ୍ରୀ କମଳନାଥ ଗଣମାଧ୍ୟମକୁ ଏହି ସୂଚନା ଦେଇଛନ୍ତି। ଏହି ଭୋଟିଂ ପରେ ତାଙ୍କ ସରକାରଙ୍କୁ ଅସ୍ଥିର କହୁଥିବା ବିଜେପି ନେତାଙ୍କ ଉପରେ କମଳନାଥ ବର୍ଷିଛନ୍ତି। ମୁଖ୍ୟମନ୍ତ୍ରୀ କମଳନାଥ କହିଛନ୍ତି ଯେ ବିଜେପି କହୁଛି ଯେ ଆମ ସରକାର ଛୋଟା ସରକାର ଓ ଏହା କେଉଁ ସମୟରେ ବି ଭାଙ୍ଗିଯାଇପାରେ। ହେଲେ ବିଧାନସଭାରେ ଅପରାଧ ଆଇନ ସଂଶୋଧନ ବିଲରେ ଭୋଟିଂ ବେଳେ ବିଜେପିର ୨ ଜଣ ବିଧାୟକ ଆମ ସରକାରଙ୍କ ସପକ୍ଷରେ ଭୋଟ ଦେଇଛନ୍ତି।
ପ୍ରକାଶଯୋଗ୍ୟ ଯେ ବୁଧବାର ମଧ୍ୟପ୍ରଦେଶ ବିଧାନସଭାରେ ବିଜେପିର ବରିଷ୍ଠ ନେତା ତଥା ବିରୋଧୀ ଦଳ ନେତା ଗୋପାଳ ଭାର୍ଗବ କହିଥିଲେ ଯେ ଆମ ଦଳର ଶୀର୍ଷ ୧ ଏବଂ ୨ ନମ୍ବର ନେତାଙ୍କ ଆଦେଶ ଆସିଲେ କମଳନାଥଙ୍କ ସରକାର ୨୪ ଘଣ୍ଟା ମଧ୍ୟରେ ଭାଙ୍ଗିଯିବ। ଗୋପାଳ ଭାର୍ଗବଙ୍କ ସଂକେତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଗୃହ ମନ୍ତ୍ରୀ ଅମିତ ଶହାଙ୍କ ଆଡକୁ ଥିଲା। ତେବେ ଏହାର ବିପରୀତ ବିଜେପି ବିଧାୟକ କଂଗ୍ରେସ ସରକାରଙ୍କ ବିଲ ସପକ୍ଷରେ ଭୋଟ ଦେଇଛନ୍ତି।
Comments are closed.